Коста Кецмановиќ, кој на 3 мај минатата година уби девет ученици и чувар во основното училиште „Владислав Рибникар“, денеска првпат ќе ја напушти психијатриската клиника каде што беше сместен по злосторството и ќе биде изведен пред Специјалниот суд.
Тој ќе сведочи во судскиот процес против неговите родители Владимир и Миљана Кецмановиќ, како и инструкторот по стрелање Немања Маринковиќ.
Тој ќе биде донесен во придружба на психијатар, а во судница ќе биде сместен во стаклена преграда за заштитени сведоци. Момчето убиец ќе може да види се, но него никој нема да може да го види.
Присутните во судницата ќе го слушаат неговото сведочење преку звучници и потенцијално ќе можат да го следат преку монитори, иако голема е веројатноста дека мониторите ќе можат да ги следат судскиот совет и, евентуално, адвокатите.
Психијатарот ќе ја следи неговата психичка состојба и евентуално ќе бара паузи.
Сето ова не се прави за да се заштитат родителите на жртвите, туку самото момче кое го изврши масовното убиство, со оглед на тоа дека има 14 години.
Поради законски прописи, на родителите на децата убиени во „Рибникар“ на тој начин ќе им биде оневозможено директно да го видат момчето кое го изврши делото.
Не е експлицитно образложено зошто рочиштето на кое ќе биде сослушан малолетникот се одржува во Специјалниот суд со оглед на тоа што одредени судници во Палатата на правдата имаат простории за особено чувствителни сведоци. Причината најверојатно е безбедноста, бидејќи носењето на момчето во Палатата на правдата е ризично, додека во Специјалниот суд брзата помош може да влезе во притворскиот влез од сосема друга страна во однос на сите останати во судницата, со што ќе се обезбеди дополнителна безбедност.
Инаку, Коста Кецмановиќ веќе бил сослушан во истрагата како сведок, но тој тогаш не ја напуштил психијатриската клиника, туку сведочел преку видео врска што обвинителството го утврдила со болницата. Покрај обвинителот и психологот, до него била и неговата мајка Миљана Кецмановиќ.
Но, тоа сега не е возможно, со оглед на тоа што во меѓувреме беше откриено дека на една од чаурите што биле пронајдени во училницата во „Рибникар“ била пронајдена нејзината ДНК, со што и таа покрај нејзиниот сопруг стана обвинета.
Малолетникот ќе може да го искористи правото да не сведочи против својот татко и мајка, со оглед на тоа што е нивен најблизок роднина и може да ја донесе таа одлука иако се согласил да сведочи против својот татко во текот на истрагата.
Доколку даде исказ, тогаш ќе биде должен да одговара на прашања кои може да му ги постават судот, обвинителот, адвокатите, обвинетите, како и претставниците на семејствата на убиените деца, како и самите родители на децата.
Кривичната постапка против родителите и сведочењето на момчето-убиец се затворени за јавноста.
