Која е тајната на луѓето кои го победиле ракот?

Лекарите ја започнаа првата глобална студија за тоа зошто некои луѓе со рак успеваат да ја победат болеста и да преживеат подолго отколку што предвидувале онколозите.

Многу онколози имаат случаи кога пациентите ги преживеале дури и најагресивните форми на рак, и покрај тоа што им се предвидува дека ќе живеат само неколку месеци, пишува Sky News.

Студијата наречена Розалинд сега собира голем број „супер преживеани“, овозможувајќи им на научниците да најдат одговори на прашањето зошто некои луѓе реагирале толку добро на третманот, додека други починале.

Научникот Танкама Ајиткумар, кој го води британскиот дел од истражувањето во Универзитетските болници во Кембриџ, рече дека целта на студијата е да се најде научна причина зад феноменот, наместо, како што беше случај досега, да се остави на среќата.

„Ова е првпат некој да се обиде да одговори на прашањето зошто постои избрана група на луѓе кои ги преживуваат овие страшни ракови“, рече Аџиткумар.

Студијата ќе се фокусира на некои од најагресивните видови на рак, вклучително и доцна фаза на рак на белите дробови, рак на мозокот и рак на панкреасот. Само три до пет проценти од пациентите преживуваат пет години по дијагнозата.

Студијата ќе вклучи научници од повеќе од 40 земји, вклучително и осум британски центри за лекување на рак. Ќе анализира детални биолошки податоци од повеќе од 1.000 пациенти и нивните тумори, споредувајќи ги генетските мутации, протеините и другите фактори кои можат да влијаат на нивниот одговор на третманот.