Питер Наваро, советник за трговија и производство во администрацијата на Доналд Трамп, стана еден од најпознатите економисти во САД поради неговото силно влијание врз воведувањето високи царини и економски стратегии кои ја обликуваа трговската политика на Трамп.
Неговите идеи за трговските тарифи и ревитализацијата на американското производство не само што ја обликуваа администрацијата на Трамп, туку и предизвикаа значителни контроверзии во политичкиот и деловниот свет, вклучително и конфликт со еден од најбогатите луѓе во светот, Илон Маск. Наваро беше клучна фигура во креирањето на трговската политика на Трамп, која имаше за цел да ги заштити американските работни места, да го намали трговскиот дефицит и да го врати производството во САД. Неговото влијание врз политиката се протега на неговите пишани дела, вклучувајќи го и трудот на 30 страници наречен „Случај за правична трговија“, во кој тој повика на спроведување високи царини за земји како Кина, Индија, ЕУ, Виетнам, Тајван и Јапонија.
Наваро беше директно вклучен во трговските битки за време на првиот мандат на Трамп како директор на Канцеларијата за трговија и производна политика. Иако многумина ги критикуваа неговите екстремни пристапи, Наваро остана клучен советник во стратегијата на Трамп, дури и откако беше обвинет и осуден за непочитување на Конгресот, откако одби да соработува во истрагата за нападот на Капитол во 2021 година, за кој помина четири месеци во затвор.
Еден од најпознатите јавни конфликти што ги имаше Питер Наваро беше со Илон Маск, основачот на Tesla и SpaceX. Судирите започнаа откако Наваро ја критикуваше улогата на Маск во автомобилската индустрија, нарекувајќи го „склопувач на автомобили“ наместо вистински производител. Според него, Маск е само „склопувач на автомобили“, бидејќи Tesla, и покрај вертикалната интеграција, сè уште зависи од увезените делови. Маск силно одговори на критиките, нарекувајќи го Наваро „морон“ и истакна дека неговиот докторат по економија од Харвард е „лоша работа“. Маск тогаш изјави дека Тесла е всушност најинтегрираната американска автомобилска компанија, со најголем процент на американски делови. Набргу потоа, конфликтот ескалираше, а Наваро одговори дека Маск ги штити своите деловни интереси. Иако администрацијата на Трамп е позната по внатрешни конфликти, оваа јавна пресметка меѓу двајца влијателни членови на администрацијата на Трамп е симболична за различните ставови за трговската политика.
Наваро не се откажа од своите ставови и продолжува силно да се залага за високи царини кои наводно ќе го заштитат американското производство. Тој често нагласува дека американската економија ќе има корист од политиките на Трамп, предвидувајќи закрепнување на пазарите и големи придобивки за компаниите што произведуваат во САД. Во интервјуата и јавните настапи, тој ги повика инвеститорите да останат смирени, тврдејќи дека пазарот наскоро ќе достигне нов врв благодарение на царините.
