Иранскиот претседател Ебрахим Раиси и министерот за надворешни работи Хосеин Амир Абдолахиан загинаа кога нивниот хеликоптер се урнал додека минувале планински терен во густа магла, објави утринава иранската новинска агенција Мехр.
Доцна синоќа воени екипажи се упатија кон локацијата каде се урна хеликоптерот во кој се превезуваше иранскиот претседател Ебрахим Раиси, пренесе Си-ен-ен, повикувајќи се на изјава од ирански воен командант дека добиле сигнал од хеликоптерот и мобилниот телефон на еден од членовите на екипажот.
Ројтерс објави дека хеликоптерот целосно изгорел во падот, повикувајќи се на ирански претставник.
Хеликоптерот во кој се превезуваше иранскиот претседател Ебрахим Раиси се урна вчера додека минувал планински терен во густа магла на враќање од посетата на границата со Азербејџан. Покрај Раиси во хелокоптерот се наоѓале и шефот на дипломатијата Хосеин Амир Абдолахиан и уште двајца функционери.
Ебрахим Раиси, е претседател на Иран од 2021 година и ја води земјата во позадината на несогласувањата на меѓународно ниво и со внатрешни оспорувања, оцени синоќа агенцијата Франс прес.
Шеесет и тригодишниот Раиси, секогаш со црн турбан на главата и верска облека, важи за ултраконзервативец и отворен поддржувач на јавниот ред.
Тој беше избран на 18 јуни 2021 година во првиот круг на гласање обележан со рекордно воздржување за претседателските избори и отсуство на силни конкуренти.
Тој го наследи умерениот Хасан Рохани, кој го порази на претседателските избори во 2017 година и не можеше повторно да се кандидира по два последователни мандати.
Раиси се појави зајакнат по парламентарните избори одржани во март и средината на мај. Тоа беа првите национални избори по протестното движење што го потресе Иран кон крајот на 2022 година по смртта на Махса Амини, млада жена уапсена поради непочитување на строгиот кодекс на облекување.
По тие избори, иранскиот претседател го поздрави „новиот историски пораз што им беше нанесен на иранските непријатели по немирите“ во 2022 година.
Парламентот, кој ќе ја преземе функцијата на 27 мај, во голема мера ќе биде контролиран од конзервативните и ултраконзервативните табори, кои ја поддржуваат неговата влада.
Во последниве месеци, Раиси се претстави како жесток противник на Израел, заколнатиот непријател на Исламската Република, кој го поддржува палестинското исламистичко движење Хамас од 7 октомври, почетокот на војната во Газа.
Раиси со тоа го оправда иранскиот напад без преседан врз Израел на 13 април, со 350 беспилотни летала и проектили, од кои повеќето беа пресретнати со помош на САД и неколку други земји-сојузници на САД.
Раиси е на американската црна листа на ирански функционери кои се санкционирани поради „соучесништво во сериозни прекршувања на човековите права“, обвинение кое Техеран го отфрли.
Роден е во ноември 1960 година во светиот шиитски град Машхад на североисток. Раиси работеше на својот пат до правосудниот систем три децении.
Тој имаше 20 години кога беше назначен за главен обвинител на Карај, во близина на Техеран, за време на Исламската револуција во 1979 година.
Во 2016 година, врховниот водач ајатолахот Али Хамнеи го назначи за раководител на добротворната фондација Астан-е Кудс Разави, која управува со мавзолејот на Имам Реза во Машхад, како и со огромното наследство од индустриски и недвижен имот. Три години подоцна, тој стана шеф на главното тело на правосудните органи.
Раиси е оженет со Џамила Аламолод, професорка на Универзитетот во Техеран, со која има две ќерки кои завршиле факултет.
