Коцевски за „Политика“: Политичката злоупотреба на трагедијата во Кочани е неприфатлива

Првичните информации добиени во истрагата укажуваат дека веројатна директна причина за трагедијата во Кочани била употребата на пиротехнички средства за време на концерт во локалната дискотека. Во оваа несреќа која се случи пред зори во неделата, а одекна низ светот, загинаа 59 лица, а речиси 200 се повредени, истакна, Љупчо Коцевски, јавен обвинител на Република Северна Македонија, во интервју за српска Политика.

„Доказите што секојдневно ги собираме укажуваат дека коренот на оваа трагедија не е само во директната причина – употребата на пиротехнички средства, туку и во длабоките пропусти во системот, недоволната контрола и нерегуларностите во работењето на надлежните институции. Обвинителството, за жал, не е орган на превенција, туку на репресија. Можно е да се спречеше оваа трагедија, но сега останува да ги казниме виновниците и да направиме сè за ваков настан никогаш повеќе да не се повтори“, изјави Коцевски.

Како што истакна премиерот Христијан Мицкоски, македонската држава се соочила со многу непогоди, но ваква трагедија досега не е забележана на пошироко подрачје. Како ја дефинирате оваа трагедија, од криминална, правна и социолошка перспектива?

Вистина е дека во последните години се соочивме со многу трагични настани. Заедничко за речиси сите нив е тоа што покрај директната причина за катастрофата, често има и дополнителна причина во вид на непочитување на законот и системска корупција, што во голема мера ги зголемува катастрофалните последици. Но, она што е многу болно во овој случај е тоа што последиците се поразителни. Кочани е мал град на истокот од државата. Во оваа трагедија, за само една ноќ изгубивме речиси цела генерација млади луѓе од тој мал град, а од социолошка перспектива би рекол дека е колективна трагедија која тешко ја поднесува нашиот народ.

Врз основа на информациите од истрагата, дали надлежните органи биле информирани за овој собир и дали ја исполниле својата професионална должност наметната со овој собир?

Сето ова детално ќе го провериме како дел од истрагата. Сите овие закони и прописи постоеја на хартија, а досега најдовме речиси дека ниту еден од нив не се почитувал.

Досега, во рамките на истрагата, статус на осомничени добиле 28 лица. Тројца од нив се во болница, 18 се приведени во предистражна постапка, а седум полицајци се под истрага и се во притвор.

„Собравме голем број материјални докази, стручни мислења и сведочења што укажуваат на сериозни прекршувања на законот. Осомничените се товарат за тешки кривични дела против општата безбедност, што може да носи затворска казна до 20 години. Истрагата, исто така, опфаќа случаи на давање и примање поткуп, незаконитости при набавка на пиротехнички средства и повеќе други кривични дела“, изјави Коцевски.

Трагедијата ги потресе граѓаните низ целата држава, кои бараат правда и одговорност од сите инволвирани страни.

„На граѓаните им ветив брза и ефикасна истрага и тоа ветување ќе го исполнам. Никој нема да биде поштеден ако се утврди дека има вина, било поради директни постапки или поради пропусти во службените обврски. Оваа култура на непочитување на законите премногу долго се толерираше, а трагичниот исход е очигледен“, нагласи јавниот обвинител.

Пораки на сочувство пристигнуваат од целиот регион и пошироко, а некои земји понудија помош за истрагата и за медицинска грижа за повредените.

„Колегите од регионот, но и од други земји, изразија подготвеност да помогнат во истрагата, но засега немаме потреба од дополнителна правна поддршка. Благодарни сме и за медицинската помош што ни ја понудија неколку држави, вклучително и Србија, за лекување на тешко повредените“, рече Коцевски.

Во време на вакви трагедии, политизирањето на болката и гневот на луѓето е најголемата опасност, предупредува обвинителот.

„Оваа трагедија има димензии на национална катастрофа. Политиката нема место овде, а секој обид за злоупотреба на несреќата во политички или партиски цели е апсолутно неприфатлив. Ова не е момент за поделби, туку за обединување во заедничката цел – да се најдат и казнат виновниците и да спречиме вакви катастрофи во иднина“, заклучи Коцевски.