Кисела Вода заедно со Варшава и Мадрид во европскиот проект „Together for Green Growing“

Општина Кисела Вода ќе биде дел од европскиот проект „Together for Green Growing“ („Together4GG“), поддржан од EIT Food AMPLE Program 2025. Taa ќе ѝ се приклучи на Варшава и Мадрид како единствени градови каде што ќе се спроведува овој значаен проект, што ја потврдува посветеноста на општината кон економскиот напредок на жените и создавањето нови можности за нив.

Проектот „Together4GG“ е создаден за да ги поддржи жените во прехранбениот сектор и да ги поттикне на економска независност преку иновации и модерни бизнис решенија.

-Целта е да се понудат обуки за претприемништво, финансиска писменост, дигитален маркетинг и развој на бизнис, со што ќе се зајакне нивната позиција во локалната економија – соопштија од Општина Кисела Вода.

Покрај средствата обезбедени од проектот „Together4GG“, во висина од 50.000 евра, Општина Кисела Вода самостојно обезбедува 3 милиони денари сопствени средства за успешна имплементација и спроведување на проектните активности.

Проектот ќе започне во април 2025 година, со регрутација на учесничките, а ќе трае до октомври 2025 година.

-Оваа иницијатива не само што ќе создаде нови бизниси, туку и ќе ги промовира еколошките и одржливи решенија во локалната економија, додека истовремено ќе обезбеди платформа за формирање на Совет за женско претприемништво како поддршка за сите учеснички – нагласуваат од Општина Кисела Вода.

Водечки партнер на проектот е Вита Нова, која ќе ја координира имплементацијата и реализацијата на активностите, заедно со Општина Кисела Вода, која ќе обезбеди логистичка поддршка, промоција и ќе ја олесни вклученоста на локалната заедница. Дополнителен ќе се организираат обуки за здрава исхрана и одржливи прехранбени практики.

– Кисела Вода е општина која се залага за економска рамноправност и еднакви можности за жените. Со овој проект, нудиме платформа преку која жените ќе можат да започнат свои бизниси, да креираме вистински услови за успех на локалната економија, да поддржиме иновации и да стимулираме лидерство кај жените – наведуваат од локалната самоуправа.

Градоначалникот на Општина Кисела Вода, Орце Ѓорѓиевски истакна дека симболиката на овој проект е јасна порака за значењето на жените во економијата.

-Ова е можност за жените во нашата општина да добијат поддршка за свој бизнис во прехранбениот сектор и воедно да бидат пример за идните генерации – изјави  Ѓорѓиевски.