Кисела Вода аплицира со 16 проекти – изградба на канализации, реконструкција на улици…

Општина Кисела Вода денеска поднесе нови 10 апликации за проекти на вториот повик на Владата за финансирање на капитални инфраструктурни инвестиции, со што вкупниот број на поднесени апликации достигна 16.

И овие, како и проектите кои беа одобрени со првиот повик и чија релизација е во тек, се насочени кон модернизација и развој на клучната општинска инфраструктура. Дополнително, во подготовка е документацијата за уште неколку капитални проекти чија реализација ќе значи траен белег врз урбаниот развој на Кисела Вода.

Новоподнесените 10 проекти се: атмосферска канализациона мрежа на дел од улицата „Томе Арсовски“- од Шампионче со парк „Бирарија“, реконструкција на улицата „ Жил Верн“, реконструкција на улица „527“, основен проект за реконструкција на линиски објекти – улица „Саса“ со краци, улица „Речиште“ со краци, улици во Герника и улица „Иван Хаџиниколов“, основен проект за пешачки патеки со партерно уредување на просторот пред сала „Расадник“, основен проект за спортска сала (затворено спортско игралиште) – подрачно основно училиште „Круме Кепески“ – Припор и основен проект за реконструкција на атмосферски канал (Црн Канал) од улица „Малешевска 1“ до Мала Рада во КО Драчево 2.

-Секоја апликација што ја подготвивме е резултат на темелна анализа на реалните потреби на терен, разговори со граѓаните, стручни проценки и визија за иднината. Аплицираме за изградба и реконструкција на улици кои со децении беа заборавени, за нови градинки, за подобрување на образовната инфраструктура, како и за уредување на јавни простори што ќе ја направат нашата општина поубаво и побезбедно место за живеење. Оваа поддршка што ја нуди Владата е мошне значајна   бидејќи освен финансискиот момент, претставува и мотивација за сите нас, на локално ниво, да продолжиме да работиме со уште поголема посветеност и визија – изјави градоначалникот на Општина Кисела Вода, Орце Ѓорѓиевски