Кина објави: Возвраќаме!

Кинеското Министерство за финансии објави дека од 10 април ќе воведе дополнителни царини од 34 отсто за американските стоки.

Во соопштението тие наведуваат дека царините наметнати од Соединетите Американски Држави за кинески производи „не се во согласност со меѓународните трговски правила“.

Како дел од реципрочните мерки објавени денеска, Кина додаде 11 американски компании на својата „листа на недоверливи субјекти“, вклучувајќи производители на дронови, и воведе извозни контроли за 16 американски компании, забранувајќи го извозот на кинески предмети со двојна употреба. Министерството за трговија исто така објави антидампинг истраги за увезени медицински ЦТ рендгенски цевки со потекло од САД и Индија.

Истовремено, портпаролот на Министерството за трговија соопшти дека Кина поднела тужба до Светската трговска организација (СТО).

Оваа одлука доаѓа како директна реакција на најавата на актуелниот американски претседател Доналд Трамп за воведување на вкупни царини од 54 отсто за кинескиот извоз, вклучувајќи ги и мерките кои се веќе воведени претходно.