| Средбата која дојде неочекувано и беше изненадување за јавноста, испрати порака дека дијалогот и соработката се можни дури и меѓу најголемите политички ривали. Можеби е премногу да се очекува дека ова ќе биде почеток на ново поглавје во македонската политика, но неспорно е дека ваквите моменти отвораат простор за надеж во политичкиот дискурс, особено кога се во прашање суштинските прашања и градењето национален консензус. Иако иницијативата на лидерот на СДСМ за средба со премиерот, а потоа и со лидерите на сите парламентарни партии, не наиде на воодушевување во останатите партиски штабови, и Мицкоски и Филипче испратија позитивни тонови. -Очекувам и од другите политички партии доколку побараат средба, истото да им го предложам, посочи Мицкоски. Дел од познавачите сметаат дека средбата меѓу Мицкоски и Филипче, која беше договорена во краток временски период, е потсетник дека политиката не мора секогаш да биде арена на конфронтации, туку може да се претвори во платформа за конструктивен дијалог и заедничко делување. |
Во политички амбиент на тензии и поделби, средбата меѓу премиерот и лидер на ВМРО-ДПМНЕ Христијан Мицкоски и лидерот на СДСМ, Венко Филипче, привлече големо внимание. Средбата која дојде неочекувано и беше изненадување за јавноста, испрати порака дека дијалогот и соработката се можни дури и меѓу најголемите политички ривали. Можеби е премногу да се очекува дека ова ќе биде почеток на ново поглавје во македонската политика, но неспорно е дека ваквите моменти отвораат простор за надеж во политичкиот дискурс, особено кога се во прашање суштинските прашања и градењето национален консензус.
Иако дел од познавачите средбата ја оценија како изолиран обид за намалување на тензиите, двајцата лидери испратија позитивни тонови. Премиерот Мицкоски порача дека лидерите меѓусебно можат да се критикуваат, но за клучните правци мора да изградат култура на единство и консензус.
-Очекувам и од другите политички партии доколку побараат средба, истото да им го предложам, посочи Мицкоски.
Во однос на градење на национален консензус за суштински прашања поврзани со сегашноста но и иднината на држава, Мицкоски во гостување на телевизијата Алфа рече дека без оглед на сите разлики во партиите, важно е да се седне да се разговара за клучните теми.
-Тоа е нешто што мене како политичар ми е многу важно. Да седнеме и за клучните теми да се договориме и да немаме дисонантни тонови потоа. Ние можеме да се критикуваме за области за кои треба да има простор за критика – лоши перформанси во економијата, некој злоупотребил нешто.. но кога станува збор за клучните правци, мора да изградиме една култура која што ќе значи единство и консензус. Очекувам и од другите политички партии кои ќе побараат средба, истото да им го предложам. Кога станува збор за клучните прашања сите да бидеме обединети и да изградиме консензус. Филипче кажа дека има разбирање за нашите различни ставови поврзани со уставните измени. Тука имаме принципиелен став, тој ги знае нашите аргументи, рече Мицкоски.
Тој посочи оти цени дека ваква средба рефлектираат порака на обединување, особено околу клучните прашања.
-Ценам дека со ваква средба ќе испратиме порака дека ние политичарите ја научивме лекцијата и дека кон граѓаните треба да рефлектираме порака на обединување, на единство, посебно околу клучните прашања и низ поинаква оптика да ги гледаме работите, кога станува збор за ваков тип на прашања. Воедно, во услови на траор, на специфична емотивна состојба на населението, да испратиме порака дека политичарите не комуницираат со ниски страсти на дневна основа и со политиканство, туку можеме да се покажеме ширина, рече премиерот.
Претходно, од Владата соопштија дека на средбата Мицкоски-Филипче била истакната потребата да се работи на заедничката иднина за граѓаните, како на консензус меѓу различните страни за клучните прашања за државата и добробит на сите граѓани.
-Во тој контекст неопходно е да се мобилизираат сите напредни поединци и структури кој можат да дадат придонес на патот за развој на земјата. Македонските државни интереси треба да бидат појдовната точка во разговорите за секое прашање, стои во соопштението.
Планот на Филипче за градење долгорочна стратегија експресно ги седна на маса лидерите на двете најголеми политички партии во земјава. На 100-минутната средба во Владата во четвртокот, тие договорија заеднички тела и работни групи да работат на спроведување на реформската агенда. По средбата, Филипче изјави дека правосудството, енергетиката и стратегијата во здравството биле областите на кои ќе се фокусираат. Тој оцени дека има волја од двете страни. Уставните измени, исто така, биле на маса, но Филипче посочи дека на оваа тема имаат различни гледишта со премиерот.
-Првичните закони кои треба да стигнат во Собранието, во делот на правосудтсвото, нешто што ги тангира сите граѓани, енергетиката, и некои работи во однос на стратешките движења и проекти во здравството. Ова е еден првичен состанок, ние сеуште треба да видиме каква ќе биде таа методологија, да ја разработиме, меѓутоа, морам да кажам дека има волја од двете страни, изјави Филипче по средбата.
Ова беше прва средба помеѓу премиерот Мицкоски и лидерот на СДСМ, Филипче откако двајцата се на овие функции. Додека Мицкоски и Филипче изразија заемна подготвеност и волја за разговор, нивната средба наиде на критики кај повеќето од останатите парламентарни партии, особено од албанскиот политички блок, од каде што обвинија за „моноетничка коалиција“. Пред почетокот на состанокот, лидерот на СДСМ, сепак, демантираше дека овој состанок со Мицкоски има етничка димензија. Тој рече дека потребата за средби произлезе по трагедијата во Кочани и сите партии се поканети да присуствуваат на средбите во иднина.
Сепак, иницијативата на лидерот на СДСМ за средба со премиерот, а потоа и со лидерите на сите парламентарни партии, средби на кои ќе се формира концепт за нов општествен и политички дијалог во Македонија, не наиде на воодушевување во останатите партиски штабови. Иако, и Филипче и Мицкоски порачуваат дека сите треба да бидат вклучени.
Дел од познавачите сметаат дека средбата меѓу Мицкоски и Филипче, која беше договорена во краток временски период, е потсетник дека политиката не мора секогаш да биде арена на конфронтации, туку може да се претвори во платформа за конструктивен дијалог и заедничко делување. Самото отворање на комуникацијата меѓу двајца истакнати политички актери од спротивставени табори е позитивен сигнал и доколку не остане само симболичен гест, овој нов момент во македонските политички односи дава надеж дека македонската политика може да се движи кон помирување и соработка, наместо кон постојани поделби. (В.С.Н.)
