Националниот форум за готовина, основан од Бундесбанката како централна банка на Германија, предложи плаќањата во готовина да се заокружат до најблиските пет евроценти, со што монетите од еден и два центи ќе станат минато.
Истражувањето на Европската комисија покажа дека 53 отсто од Германците би го поддржале укинувањето на монетите во гореспоменатите апоени. Прекинувањето би значело дека, на пример, за производ по цена од 4,99 евра би платиле пет евра, а за производ од 1,02 евра би платиле едно евро.
Впечаток е дека монетите во апоени од еден и два центи играат споредна улога во плаќањата за потрошувачите. Централните банки тврдат дека монетите наскоро ќе исчезнат од готовинските плаќања, што значи дека повеќето од нив ќе завршат во касички или ќе бидат изгубени.
„Генерално, економските и еколошките трошоци за производство, пакување и транспорт на монети од еден и два центи се високи во споредба со нивната номинална вредност“, рече членот на управниот одбор на Бундесбанка, Буркхард Балц.
Укинувањето на овие монети треба да ги направи плаќањата во готовина попривлечни, а самите готовински плаќања поодржливи и поефикасни. Ова е причината зошто Националниот форум за готовина, кој се состои од претставници на трговијата на мало, банкарски здруженија, компании за транспорт на готовина и застапници на потрошувачи, побара од Федералното Министерство за финансии да се заложи и да промовира законска обврска за заокружување на цените.
Доротеа Мон, експерт за финансиски пазар во Сојузната асоцијација на организации на потрошувачи во Германија, истакна дека готовината сè уште е средство број еден за плаќање за многу потрошувачи. Но, како што истакна таа, многу од нив не сакаат да имаат ситни парички.
„Пребарувањето на последниот цент во вашиот паричник на касата на супермаркет не е нешто во што многу луѓе уживаат. Затоа е добро што Националниот форум за готовина е посветен на решенија кои дополнително ќе го зголемат прифаќањето на готовина“, рече Мон.
Но, од трговското здружение HDE се неодлучни по ова прашање, посочувајќи дека тоа би имало и позитивни и негативни последици. Некои европски земји, вклучително и Финска, долго време применуваат заокружување на цените, што значи дека не пуштаат во оптек нови монети од еден и два центи. Слични правила постојат во Холандија, Словачка, Ирска, Италија, Белгија и Естонија.
Сепак, тоа не значи дека монетите во гореспоменатите апоени се целосно укинати, бидејќи таква одлука може да се донесе само на ниво на Европската унија, пишува tagesschau.
