Наскоро ќе се распишат тендерските постапки за избор на економски оператори за реализација на трите проекти што ги доби Општина Куманово, преку владината поддршка за општините, соопштија од локалната самоуправа.
– Договорите се завршени, одобрени се средства за три проекти, како што беше претходно информирано, Општината ги распишува тендерските постапки, Владата ги финансира – изјави градоначалникот на Општина Куманово, Максим Димитриевски.
Трите проекти чинат четири милиони евра.
Инфраструктурно уредување на зоната во Речица, изградба на секундарна дистрибутивна гасоводна мрежа и изградба на атмосферска канализација на улицата „Бајрам Шабани“ се трите проекти што ќе ги спроведе Општината преку владиниот повик за развој на општините.
Општина Куманово аплицираше и за изградба на секундарна дистрибутивна гасоводна мрежа кон Доброшане, каде што функционира индустриска зона со неколку кумановски компании, кои ја движат локалната економија.
– Индустриските капацитети се важни за приклучување на гасоводната мрежа од аспект на намалување на нивните производствени трошоци и зголемување на конкурентноста, но и од аспект на намалување на аерозагадувањето во градот. Последниот проект е изградба на атмосферска канализација на улицата „Бајрам Шабани“, каде што, поради конфигурацијата на теренот, при пообилни дождови, се слева вода – заклучи Димитриевски.
