Италијанското калабрешко село Белкастро им забрани на своите жители тешки болести поради непостоечки здравствени услуги, пишува Би-Би-Си, пренесува Хина.
На жителите на Белкастро им е „наредено да избегнуваат какви било заболувања кои бараат итна медицинска помош“, се вели во декретот на градоначалникот Антонио Торчија.
Околу половина од населението се постари од 65 години
Торчија нагласи дека овој потег е „очигледно хумористична провокација“, но дека има поголема резонанца од писмата што тој ги испрати до регионалните власти со предупредувања за проблемите на локалниот здравствен систем.
Околу половина од 1,2 илјади жители на Белкастро се постари од 65 години, најблиската здравствена установа е оддалечена повеќе од 45 километри, а патот до неа е со граница од 30 километри на час, рече градоначалникот.
Докторот кој пристигнува во селото на повик е достапен само спорадично и не работи за викенд, за празници или надвор од работното време.
Еден од најсиромашните италијански региони
На жителите, исто така, им беше наложено како дел од уредбата да не се однесуваат на „начин што може да биде штетен, да се избегнат несреќи дома“ и „да не го напуштаат домот премногу често, да не патуваат, да не спортуваат и наместо тоа најголем дел од времето да се одмораат“, пренесува Би-Би-Си.
Белкастро се наоѓа во јужниот регион на Калабрија, еден од најсиромашните во Италија.
Лошото политичко управување и мафијата го уништија тамошниот здравствен систем, кој пред 15 години беше ставен под посебна контрола на централната власт. Осумнаесет болници во тој регион се затворени од 2009 година.
