Какви резултати даде досега бојкотот на трговските синџири во Србија?

Српското здружение за заштита на потрошувачите „Ефектива“ повика на обновен бојкот на трговскиот синџир Макси (Мaxi) поради високите цени, а идејата е бојкотот да трае цел април.

„Борбата за пониски цени на храната е во тек. Не влегувајте, не купувајте“, порачаа од Ефектива во објавата на социјалната мрежа Х.

Според нив, доколку Maкси ги намали цените, ќе мораат сите други трговски синџири.

Поминаа нешто повеќе од два месеци од првиот еднодневен бојкот на малопродажните синџири во Србија поради високите цени. Потоа, поединечни трговци постепено беа мета на бојкотот, а иако нема официјални резултати за неговиот успех, некои ефекти се видливи.Здружението за заштита на потрошувачите Ефектива ги повика граѓаните на 31-ви јануари да ги бојкотираат петте најголеми трговски синџири во Србија – Делезе (Макси и Шоп&Го), Меркатор (Рода и Идеа), ДИС, Универекспорт и Лидл.

Кампањата за бојкот првично наиде на добар одзив кај потрошувачите, а бојкотот донесе значителен пад на прометот во споменатите трговски синџири.Според податоците на српската даночна управа, на 31 јануари бројот на издадени фискални сметки бил за околу четвртина помал од претходниот, а имало и пад на прометот за 32 отсто.

По тој еднодневен бојкот, Ефектива заедно со здруженијата Просперитет од Нови Сад и Републичкиот сојуз на потрошувачи од Белград упатија нов повик за бојкот на истите трговски синџири, но за период од пет дена, односно од 10 до 14 февруари.

Причината за овој петдневен бојкот е, како што тогаш објаснија, немањето реакција од трговските синџири на претходниот бојкот, а во некои случаи дури и поскапувањата.

Официјални податоци за прометот за овој петдневен бојкот немаше, но проценките на Ефектива беа дека приходот на малопродажните синџири во овој период бил за 25 до 30 проценти помал од претходната недела.