Јуриќ: Се надевам дека некој кој е на слобода, а ја знае вистината, ќе се вразуми и ќе проговори што се случило со малата Данка

Двајца вработени во „Водовод“ Бор се осомничени дека на 26 март лани со службениот автомобил прво ја удриле Данка во близина на местото каде што се изгубила, по што мислејќи дека е мртва ја ставиле во багажникот, а кога виделе дека се движи, еден од нив со голи раце ја задавил и ја фрлил на депонија. Обвинение има и против таткото на едниот од нив, кој се товари за соучесништво бидејќи помогнал да се премести телото на девојчето. Материјални докази или ДНК кои упатуваат на двајцата обвинети за убиство нема, а не е пронајдено ниту телото на Данка. Исто така, нема најава кога ќе почне судскиот процес откако обвинението што го изготви надлежниот суд во Заечар по вторпат е потврдено уште во февруари

Двегодишната Данка Илиќ од Бор исчезна од дворот на семејниот имот во блиското место Бањско Поле, пред очите на мајката и братчето, точно пред една година. Телото на девојчето не е пронајдено до ден-денес, но за нејзино убиство се обвинети двајца жители на села во околината на Бор вработени во „Водовод“. Тие се цела година во притвор, обвинението што го изготви надлежниот суд во Заечар во февруари е потврдено по вторпат, но не е соопштено на кој начин е изменето во однос на првото. Исто така, уште не се објавени информации за одлуките за жалбите на по вторпат потврденото обвинение, па не се знае дали и кога ќе почне судскиот процес. Со тоа, овој случај, кој го вознемири и го крена на нозе целиот регион, една година подоцна сè уште е обвиен во мистерија и со низа неодговорени прашања, почнувајќи од тоа каде е телото на Данка, па до тоа дали таа можеби е уште жива.

Двајцата педесетгодишници вработени во „Водовод“ Бор се осомничени дека на 26 март лани со службениот автомобил прво ја удриле Данка во близина на местото каде што се изгубила, по што мислејќи дека е мртва ја ставиле во багажникот. Како што се товарат во обвинението, кое се базира на нивно признание по апсењето, кога забележале дека девојчето е живо, едниот од нив го задавил и телото го фрлил на блиската дива депонија. Два дена подоцна, со помош на братот и таткото го преместил телото, кое не е пронајдено и покрај опсежното повеќемесечно пребарување на теренот со сите средства што стојат на располагање. За помагање во сокривање на телото притворени беа и братот и таткото на едниот од осомничените. Братот почина во полициска станица, наводно од срцев удар, а многу подоцна обдукцијата покажа дека неговата смрт била резултат на полициска бруталност. Против таткото, кој сега се брани од слобода, има обвинение за помагање.

Во истрагата беа сослушани голем број сведоци, главно жители на Бањско Поле и собрани разни траги, но нема ниту еден материјален доказ, ниту ДНК кои посочуваат кон двајцата осомничени како извршители на делото за кое се товарат. По признанието што го дале кога беа уапсени, подоцна тие негираа вина, правдајќи се со тоа дека убиството го признале бидејќи биле малтретирани од полицијата.

– Тешко е да се донесе конечен заклучок за целиот случај. Во разговорите со граѓаните од тоа место, многумина сметаат дека детето е сè уште живо, поради одредени околности кои настанале. Од друга страна, ако ги погледнеме изјавите на родителите, таткото во пресрет на годишнината од исчезнувањето изјавил дека верува дека неговото дете е живо, што е во спротивност со обвинувањата на семејството против осомничените, изјави вчера Игор Јуриќ, директор на Центарот за исчезнати и малтретирани деца, кој помагаше во потрагата по девојчето.

По повод годишнината од исчезнувањето на Данка, тој вчера изрази надеж дека некој кој сè уште е на слобода, а ја знае правата вистина, ќе се вразуми и ќе проговори на судењето. Исто така, изнесе претпоставка дека смрт на детето ќе биде прогласена доколку се донесе правосилна судска пресуда за убиство.

-Кога детето исчезнува, смртта може да се прогласи само во вонсудска постапка, но само кога семејството ќе го побара тоа. Според мене, обвинението секако ќе биде потврдено. Сепак, тоа е помалку важно од вистината – најважно е да откриете што навистина се случило со детето. А тоа по една година ќе биде исклучително тешко, објасни Јуриќ за „Блиц“.

Според него, во истрагата имало пропусти и целиот случај на почетокот бил сфатен несериозно.

-Со оглед на возраста на детето и местото на неговото исчезнување, истражните органи можеби ја потцениле сериозноста на ситуацијата, бидејќи ништо не укажувало на можност за киднапирање или тешко убиство. Сепак, останува клучното прашање – како дете од две години може да исчезне, а никој да не го најде, вели Јуриќ.

Родителите на Данка, Милош и Ивана Илиќ, неодамна одговарајќи на прашања на јавноста на „Тик-ток“ рекоа дека веруваат во наводите во обвинението против обвинетите за киднапирање и убиство на Данка. Тие кажаа дека има многу докази против обвинетите и не веруваат дека нивната Данка е продадена.