Јурген Клоп се враќа на големата сцена

Јурген Клоп менаџираше со англискиот премиерлигаш Ливерпул повеќе од осум години. Во тој период „црвените“ постигнуваа одлични резултати, а во прв план е шампионската титула која ја чекаа три децении.

Германецот се прости од „Енфилд“ на крајот од минатата сезона, а потоа ја презеде функцијата директор за фудбал во Ред Бул и ги контролира сите клубови кои играат под овој познат бренд.

Сепак, 57-годишниот би можел да се врати на тренерската работа веќе следната сезона. Најтрофејниот клуб во италијанската Серија А, Јувентус, го посакува за нов шеф на стручниот штаб.

„Старата дама“ минува низ турбулентен период, тренерите се менуваат, резултатите недостасуваат и ова го вклучи алармот за човекот кој раководеше со „бјанконерите“ долги години. Веќе не е тајна дека Андреа Ањели сака повторно да го преземе клубот.

„Андреа Ањели сака повторно да го преземе Јувентус и целосно да се ослободи од својот братучед Џон Елкан и неговата компанија“, пишува Tuttosport и продолжува:

„Преговорите се водат со месеци со помош на актуелниот претседател Ферер. На Ањели му помага одредена американска група, веројатно Ред Бул. Ањели сака да го врати Јувентус таму каде што беше под негово водство. Идејата е да се започне од нула со Јирген Клоп како тренер“.

Очигледно поранешниот претседател на „бјанконерите“ веќе не може да гледа што се случува со неговиот сакан клуб и е решен да се врати.

Јувентус ја освои последната титула во Серија А во 2020 година. Потоа дојде голема криза, тренерите се менуваа еден по друг, а ни актуелниот Тијаго Мота нема долго да трае.

Овој стручњак дојде со големи планови но се очекува да си замине и тоа пред крајот на сезоната.

Андреа Ањели претходно раководеше со Јувентус од 2010 до 2022 година и имаше период на доминација во италијанскиот фудбал. Малкумина можеа да се натпреваруваат со „старата дама“, а во тој период беа освоени 20 трофеи, од кои девет шампионски титули.