Јавното претпријатие „Комунална хигиена“ преку соопштение информираше дека ќе го отстрани сметот, но и, како што кажаа оттаму, срамот на градоначалникот на Општина Шуто Оризари, Курто Дудуш. Но, известија и дека ќе ѝ биде доставена фактура на Општина Шуто Оризари за ова.
Од претпријатието реагираа по објавата на Дудуш дека Општината тоне во смет, за што сподели и видео.
За видеото и за фотографиите што ги објави градоначалникот Курто Дудуш, од ЈП „Комунална хигиена“ велат дека се од контејнери и од локации за кои е одговорна Општината со која управува тој.
– Контејнерите што се во надлежност на „Комунална хигиена“ редовно се чистат и дезинфицираат, што, за жал, не е случај со општинските садови и со дивите локации во неговата општина на кои се фрла отпад – потенцираат од ЈП „Комунална хигиена“.
Дополнително, оттаму наведуваат дека го задолжиле Курто Дудуш со мандатна казна за формирање дива депонија на територијата на Општина Шуто Оризари и дека се во тек и други постапки поведени против него, за дела спротивни на законот, за кои се очекуваат разврски. Тоа, како што велат, всушност, е и причината за неговите однесување и напади кон Град Скопје и кон јавното претпријатие „Комунална хигиена“.
