Ламина Јамал има само 17 години и веќе некое време сите му се восхитуваат поради начинот на кој игра во дресот на Барселона. Со само 15 години дебитираше за првиот тим на каталонскиот гигант, а се истакна лани на ЕП кога ја освои титулата со Шпанија.
Крилниот напаѓач беше дел од селекцијата на Шпанија која во финалето ја победи Англија со 2:1 и поради одличните настапи во Германија беше прогласен за најдобар играч на турнирот.
Јамал, кој оваа сезона има пет гола и десет асистенции за Барселона, беше запрашан да коментира со кој играч би сакал да игра, а тој без да размислува премногу одговори: „Кевин де Бруин“.
Повеќето љубители на фудбалот веројатно би биле возбудени од можноста Јамал и Де Бруин (33) да се поврзат, но тоа изгледа малку веројатно со оглед на 16-годишната возрасна разлика помеѓу двајцата.
Некои се убедени дека Јамал има јасен план – во иднина да го носи дресот на Сити, иако е јасно дека многу тимови ќе го посакуваат, а Барса ќе направи апсолутно се за да го задржи. Тој моментално има договор до 2026 година и Каталонците не спијат мирно…
Додека Јамал играше совршно за Барса оваа сезона, Де Бруин се бореше со повредите и не го имаше истиот резултат со Манчестер Сити како во претходните години.
Репрезентативецот на Белгија оваа сезона забележа шест асистенции и два гола во првенството, но се чини дека ќе го напушти англискиот шампион на крајот од сезоната кога ќе му истече договорот.
Клубовите од САД и Саудиска Арабија веќе подолго време го следат и еден од нив би можел да го донесе на лето. Говорејќи пред новинарите по победата на Сити од 4:1 против Вест Хем на 5 јануари, Белгиецот откри детали за својата иднина.
„Гласини за мојата иднина? Не ми е грижа. Само се обидувам да се вратам на моето ниво. Чувствувам дека станувам подобар секоја недела. Сега можам да играм 90 минути, истакна поранешниот играч на Челзи и Волфсбург.
