Виетнамската тајкунка за недвижности Тронг Ми Лан денеска беше осудена за измама за набавка на имот во вредност од милијарди долари во случај кој беше централен дел на владината акција против корупцијата.
Во април, Тронг Ми Лан беше осудена на смрт во истиот суд, за измама во износ од 12,5 милијарди долари, речиси три отсто од бруто домашниот производ на земјата.
Судењата се поделени на два дела поради бројот на обвиненија против неа, а денешната пресуда, која предвидува максимална казна доживотен затвор, ги надополнува нејзините правни проблеми додека ја чека разврската на жалбата за нејзината смртна казна.
Во случајот беа осудени уште 33 лица, но детали за пресудите не беа веднаш достапни. Казната на Лан се очекува да биде објавена во текот на денот.
Покрај стекнување имот преку измама, Лан била осудена и за перење пари и обвиненија за нелегален прекуграничен трансфер на пари, јавуваат државните медиуми.
Лан и нејзиното семејство ја основаа компанијата Ван Тин Пат во 1992 година, откако Виетнам премина од државна економија кон пазарно ориентиран пристап и стана отворен за странски инвеститори.
Ван Тин Пат стана една од најбогатите компании за недвижнини во Виетнам, со проекти кои вклучуваат луксузни станбени згради, канцеларии, хотели и трговски центри. Ова ја направи клучен фактор во финансиската состојба на земјата.
