Израелскиот министер за одбрана Јоав Галант денеска изјави дека Израел има „повеќе изненадувања за Хезболах“ додека израелските копнени операции продолжуваат во јужен Либан.
„Хезболах доби многу сериозни удари, еден по друг. Го елиминиравме лидерот на движењето, Хасан Насрала, и имаме уште изненадувања, од кои некои се веќе извршени, а некои допрва треба да се извршат“, изјави Галант за време на посетата на штабот на 36-та дивизија на вооружените сили на северот на Израел, објави Тајмс оф Израел.
Војниците од таа дивизија се активни во операции во јужен Либан.
Израелскиот министер додаде дека ракетната дивизија на Хезболах претрпела многу тежок удар, а значителен дел од неа е уништен во висококвалитетна и прецизна операција.
„Уништени се командните и контролните штабови, комуникациите, целото раководство на елитните сили Радван и всушност целото второ и трето ниво на команда под Насралах“, рече тој.
Галант додаде дека израелската армија денеска спроведува операции во неколку села, а тој процес ќе продолжи секаде каде што е потребно за да се уништи сета инфраструктура од која Хезболах планира да изврши напади, пренесува Танјуг.
