Изложба „Странски сликари во Македонија во периодот 1850 – 1950“ во Музеј на град Скопје

Во Музејот на град Скопје вечер во 19.30 часот ќе биде отворена изложба на дела од странски уметници кои ја посетиле Македонија и твореле на теми поврзани со нашата држава, во периодот од 1850 до 1950 година.

Според организаторите на изложбата станува збор за дела на уметници од Германија, Франција, Италија, Србија, Југославија, Полска, Чехословачка, Унгарија, Австрија, Романија, Холандија, Белгија и САД.

„Делата се од приватна колекција на Влатко Милошевски, а изложбата се реализира со помош на Зоран Андонов, кој е и уредник и одговорен издавач на каталогот и монографијата“, велат од Музејот на град Скопје.

Изложбата која ќе биде претставена со луксузна монографија и каталог, е поддржана од Министерството за култура и туризам.

Посетителите ќе имаат можност да ги видат делата до 23 април, до кога ќе биде отворена изложбата за јавност.