Изградбата на социјалната населба во Турското Маало во Струмица е во полн ек. Првата фаза која опфати: изградба на канализација, улица и потпорни ѕидови, како и поставување на улично осветлување, како и втората која опфати поставување на водоводна линија и резервоар се веќе завршени.
Сега останува да се реализира третата фаза во која треба да се изградат 118 куќи со кои трајно ќе се реши проблемот за домување на социјално ранливите граѓани од Турското Маало во Струмица.
Станува збор за еден од поголемите капитални проекти во оваа општина. Денеска, локацијата на која треба да се изградат куќите ја посетија претседателот на Социјалдемократскиот сојуз на Македонија, Венко Филипче, заедно со градоначалникот на општина Струмица, Коста Костадинов.
-Ова ќе биде една цела нова населба, еден мини град, каде што градежните работи се почнати од нула. На локацијата немаше ништо, а сега веќе има канализација, има струја, има улица и во следната, односно во последна фаза ќе почне изградбата на објектите. Ова ќе биде населба во која ќе се сместат луѓе од ранливи категории кои сега живеат во супстандардни и небезбедни услови. Во овие 118 станбени единици со соодветни стандарди, квалитетот на животот на тие граѓани значајно ќе се подобри и дополнително ќе се решат инфраструктурните проблеми во близина на оваа населба, како што е водоснабдувањето – изјави Филипче.
Костадинов наведе дека за реализација на првата фаза се потрошени 100 милиони денари и е целосно завршена.
– Во втората фаза е поставена водоводна линија, има нов резервоар којшто не ги решава само проблемите на оваа нова Турска социјална населба, туку го решава и проблемот со водоснабдување во горниот дел од градот кој се јавуваше во летниот период. Веќе сме подготвени за започнување на првиот дел од третата фаза, а тоа значи дека од страна на Секторот за урбанизам изготвени се проекти за 26 куќи од вкупно 118, и согласно вториот повик распишан од страна на Владата ние веќе имаме аплицирано и се надеваме дека овој пат Владата ќе се издигне над дневнопартиските нивни интереси и конечно ќе даде поддршка за она што значи крупни капитални проекти за граѓаните на општина Струмица – истакна Костадинов.
Освен овој, како што го нарече крупен проект на општина Струмица, Филипче ги спомена и новиот пазар, автобуската станица, електричниот јавен превоз.
-Општина Струмица е пример како со дела се развиваат и имплементираат проекти кои суштински менуваат работи и го подобруваат животот на граѓаните – заклучи Филипче.
