Продажбата на куќи за едно евро стана вообичаен начин италијанските села каде се намалува бројот на жителите, да се обидат да го зголемат своето население. Сега, еден град во Сицилија користи сличен план за да привлече повеќе туристи.
За помалку од цената на едно еспресо, туристите можат да поминат долг викенд во крајбрежниот град Сикулиана, Сицилија.
Понудата за одмор на 1 евро има за цел да привлече повеќе посетители во областа надвор од туристичката сезона и да ја стави дестинацијата на радарот на туристите, пишува Euronews.
Што добивате на одморот од 1 евро во овој сицилијански град?
Сикулиана на неколку среќни патници им нуди одмор платен со сите трошоци – единственото нешто што треба да го платите е туристичката такса од 1 евро на Сицилија.
Сместување, оброци и тури со водич за дводневен престој се вклучени во понудата, иако туристите мора сами да дојдат до градот на западниот брег на островот.
Одморот го организира Туристичката организација Сикулијана, а наградените ќе престојуваат во еден од партнерските капацитети на организацијата.
По пристигнувањето, избраните посетители ќе бидат пречекани во хотелот, а на крајот од одморот ќе уживаат во пијалок покрај пристаништето.
Ќе се организираат екскурзии со водич до најубавите места, како што се Марина Сикулиана и природниот резерват Трес Салса со заштитените плажи и драматичните карпи.
Но, за да имате шанса да ја освоите оваа понуда, ќе мора да бидете креативни.
Како можете да освоите одмор за 1 евро во Сикулиана?
Оние кои сакаат да аплицираат за овој прифатлив одмор ќе треба да поднесат оригинално видео во кое ќе ги објаснат нивните мотиви зошто сакаат да учествуваат.
Ако никогаш не сте слушнале за Сикулиана, ова може да биде предизвик. Сепак, туристичката организација Сикулиана нуди неколку идеи за тоа што можете да кажете во видетото, како што се „заслужуваме одмор“, „ја сакаме Сицилија“ и „сакаме да јадеме сицилијанска храна“.
За да можете да се пријавите, мора да имате над 18 години и да снимате видео во пар. Во вашата апликација, задолжително наведете ја вашата врска (на пример, пријатели, семејство, брачни парови), возраст, место на живеење, како и телефонски броеви за контакт и адреси на е-пошта.
Апликациите ќе ги оценува Туристичката организација, која бара различни елементи во успешна апликација, вклучувајќи оригиналност и креативност, причини за посета и ентузијазам и желба да се открие Сикулиана.
Пријавите треба да се достават најдоцна до 15 март. Достапни се 10 места за парови, а победниците ќе бидат објавени на 20 март. Првиот одмор ќе биде од 4-ти до 6-ти април.
