– Во програмата за манифестацијата се предвидени над 130 настани од речиси сите културни дејности. Но, тоа не е и конечниот број активности, затоа што сите настани и активности од областа на културата во текот на годината ќе го носат обележјето „Гевгелија – Град на културата“ – вели во разговорот за весникот ВЕЧЕР Андон Сарамандов, градоначалникот на Општина Гевгелија

Манифестацијата „Гевгелија – Град на културата“ е шанса уште еднаш овој град да ја потврди својата богата културна традиција и шанса гевгелиските создавачи на културата и на уметноста да ги покажат своите високи културни вредности.

Гевгелија, по втор пат, по 2011 година, е Град на културата. Признание, чест или обврска?

Изминатите три години, Гевгелија се профилира како град со голем број културни настани и како награда за сработеното, годинава од Министерството за култура и туризам сме избрани за Град на културата. Гевгелија, по 14 години, повторно е прогласена за Град на културата, признание што претставува чест за нас, како локална самоуправа, а, секако, и за граѓаните, но истовремено и обврска. Чест е затоа што Министерството по вторпат ѝ ја дава довербата на Општина Гевгелија да го реализира овој проект од национален интерес и градот да биде домаќин на бројни културни настани и манифестации. Обврска е зашто Општината, заедно со културните институции на локално ниво, има сериозна одговорност, да го менаџира и координира целиот проект, кој ќе понуди разновидни културни настани во текот на годината.

Организатор е Општина Гевгелија,  а поддржувач Министерството за култура и туризам. Колку финансиски средства се предвидени за оваа манифестација?

Врз основа на поднесената апликација на јавниот повик и подготвената предлог-програма, по донесеното решение годинава Гевгелија да биде прогласена за Град на културата, Министерството за култура и туризам учествува со 3.000.000 денари финансиска поддршка на дел од манифестациите. Додека Општина Гевгелија учествува со проектираниот буџет за Програмата за финансиска поддршка на културни проекти и програми за 2025 година.

 

Колку настани се предвидени да се организираат во текот на оваа манифестација, кои се носители и од кој профил се настаните?

Во програмата се предвидени над 130 настани од речиси сите културни дејности. Но, тоа не е и конечниот број активности, затоа што сите настани и активности од областа на културата во текот на годината ќе го носат  обележјето „Гевгелија – Град на културата“. Носители на активностите се националните културни установи (НОБ, Македонската филхармонија, Националниот џез-оркестар, Националната галерија, Драмски театар, Македонскиот народен театар, Театарот за деца и младинци, НУЦК „Антон Панов“ – Струмица, „Џинот“ – Велес, „Чернодрински“ – Прилеп“, НУ Музеј Гевгелија), локалните установи од областа на културата (ЈОУ Дом на културата „Македонија“, ЈОУ Библиотека „Гоце Делчев“, ЈОУ Пионерски дом „Јосип Броз Тито“), како и самостојни уметници, правни лица и здруженија на граѓани од Општина Гевгелија што остваруваат културна дејност. Проектот од национален интерес, манифестацијата „Гевгелија – Град на културата 2025“, ќе понуди квалитетни културни настани за сечиј вкус и за сечија возраст, од областа на литературата, ликовната уметност, театарот, музиката, филмот, фолклорот, танцот и сл.

Што би издвоиле од настаните на кои ќе учествуваат творци од Општината?

Гевгелија има богата културна традиција и брендирани културни настани, што го потврди и Министерството за култура и туризам, давајќи ни ја довербата за реализација на овој проект. Впрочем, тоа се потврдува и низ годините, затоа што Општина Гевгелија става голем акцент на негувањето на  културата, покрај другите надлежности, со голем број финансиски поддржани, но и реализирани проекти и активности, како на правните така и на физичките лица. Но, ова е уште една шанса нашите локални чинители да ги презентираат високите културни вредности. Секој настан што е предвиден за реализација, си има своја посебна уметничка вредност и е во функција на културниот развој на Општината. Доволно е само да се каже дека во Гевгелија ќе гостуваат најрепрезентативните национални културни установи во земјата со свои проекти, а богата програма ќе понудат и локалните културни установи и здруженија.

Избрани се логото и плакатот. Колку сте задоволни од пристигнатите предлози и што ќе доминира на логото и на плакатот?

Манифестацијата доби свои лого и плакат според идејното решение на графичкиот дизајнер Катерина Пренда, кое, од деветте пристигнати апликации, беше едногласно избрано од Одборот за реализација на манифестацијата. Логото на Катерина Пренда е инспирирано од релјефната чаша со македонски штит, од III-II век пр. н. е., пронајдена на археолошкиот локалитет Вардарски Рид кај Гевгелија. Всушност, релјефната чаша е прикажана како сонце со концентрични кругови, симбол на Гевгелија за нејзините светлина, топлина, виталност и гостопримство и град епицентар на културните настани во 2025. Инаку, сите пристигнати идејни решенија за логото беа креативни и, на некој начин, ги исполнуваа критериумите. Дел од нив беа модернистички, а другите комбинации од модернистичкото и традиционалното.

За кога се планира свеченото отворање на манифестацијата и кој сè ќе учествува?

Свеченото отворање на манифестацијата „Град на културата за 2025“ е закажано за 11 април, со свечен концерт на Националниот џез-оркестар, на Градскиот плоштад. На концертот, кој ќе започне во 19:30 часот, ќе му претходи свечено дефиле, како и отворање на самостојната изложба на Ана Митевска „Приказни во тиркиз – извор на животот“, во Уметничката галерија „Амам“.

Дали оваа манифестација е шанса и за привлекување поголем број туристи во нашиот град?

Секако, бидејќи согласно со туристичката платформа на Општина Гевгелија, покрај афирмацијата на туристичките погодности и капацитети, предвидена е и збогатена културна понуда. При подготовката на програмата за „Гевгелија – Град на културата за 2025 година“, Општината, во соработка со локалните институции, како и НВО-секторот, настојуваше да бидат опфатени квалитетни, оригинални и разновидни културни содржини, кои ќе го привлечат вниманието не само на граѓаните на општина Гевгелија туку и пошироко, од земјата и од соседството. Преку летните месеци, Гевгелија станува привлечна транзитно-туристичка станица, каде што преноќуваат  голем број туристи, пазаруваат и уживаат во гастрономската понуда. Наша цел е на овие туристи, токму летово, во текот на манифестацијата, да им понудиме повеќе интересни културни манифестации и настани на отворено, кои ќе го привлечат нивното внимание. Сè со цел да останат некој ден повеќе во Гевгелија. Се надеваме дека ќе успееме во таа цел, Гевгелија да биде не само културна метропола туку и да стане значајна туристичка дестинација.

Љубчо АЛЕКСОВСКИ

ИЗДВОЕНИ

ПОВРЗАНИ ОБЈАВИПОВЕЌЕ ОД АВТОРОТ