Интерпол воведува ново „оружје“ во борбата против криминалот!

Меѓународната организација за криминалистичка полиција Интерпол неодамна воведе нова алатка во борбата против прекуграничниот криминал – т.н. сребрена потерница (Silver Notice). Овој инструмент е дизајниран да им олесни на земјите-членки да ги следат, идентификуваат и повратат средствата добиени од криминални активности.

Сребрената потерница претставува значаен чекор напред во меѓународната соработка за спроведување на законот, особено кога станува збор за финансискиот криминал. Како иновативен механизам, сребрената потерница овозможува побрза и поефикасна размена на клучни информации за имотот што е предмет на истраги, а со тоа значително ја подобрува глобалната борба против софистицираните форми на криминал.

Таа ги надополнува постоечките механизми и обезбедува дополнително ниво на сигурност во меѓународните финансиски трансакции и истраги.

Сребрената потерница е меѓународно барање за соработка или предупредување во кое се однесува на имот поврзан со криминал. За разлика од попознатите потерници на Интерпол како црвената (за апсење) и сината (за собирање информации), сребрената се фокусира исклучиво за имотот. Целта е да се лоцираат, идентификуваат, следат и на крајот да се олесни враќањето на нелегално стекнатите имоти лоцирани во странство.

Со воведувањето, Интерпол одговори на зголемената потреба за алатка која може ефективно да ги следи и управува средствата кои произлегуваат од криминалните активности, кои често ги преминуваат националните граници.

Главната цел на оваа потерница е да го поедностави и забрза процесот на билатерални барања за заплена, конфискација или враќање на имотот. Може да се користи и во случаи на измама, корупција, еколошки криминал, во случај на шверц на уметнички и културни добра, како и во случај на компјутерски криминал.

Проектот сребрена потерница моментално е во пилот фаза, која ќе трае најмалку до ноември 2025 година. Во оваа фаза учествуваат 52 земји и територии, што укажува на широка меѓународна поддршка за оваа иницијатива. Успехот на пилот фазата ќе биде клучен за понатамошниот развој и проширување на примената на сребрената потерница.

На долг рок, сребрената потерница се очекува да стане стандардна алатка во меѓународните истраги за финансиски криминал.