Институциите да се координираат за брза реакција при поплави и пожари

За да се спречат поплавите и шумските пожари, неопходна е континуирана акција и соработка меѓу институциите, но и системски решенија за превенција и нивна рана детекција. Ова е констатирано на состанокот на Управниот одбор на Заедницата на единиците на локална самоуправа (ЗЕЛС), што се одржа вчера во присуство и на министерот за внатрешни работи Панче Тошковски.

Главен акцент бил ставен на унапредување на координацијата меѓу институциите и преземање конкретни чекори за спречување на природни катастрофи.

Претседателот на ЗЕЛС, Орце Ѓорѓиевски, смета дека за да се намали опасноста од поплави и шумски пожари, неопходно е локалните самоуправи активно да работат на чистење на атмосферските канали и одржување на речните корита, а во шумските подрачја да се направат засеци кои ќе спречат ширење на пожарите.

– Разговаравме и со претседателот на Владата, од каде што добивме уверување дека ќе се зајакнат капацитетите на противпожарните бригади, што е клучно за поефикасно справување со овие предизвици – изјави Ѓорѓиевски.

Министерот за внатрешни работи, Панче Тошковски, на состанокот ја навел и потребата од ставање во функција на целокупната расположлива механизација и противпожарни возила, како и идентификација на критичните точки каде што е неопходна итна интервенција на државата.

Дополнително било најавено зголемување на капацитетите за справување со кризни ситуации, вклучително и подготвеност на авионите за брза реакција во претстојната сезона.

– ЗЕЛС и Владата остануваат посветени на изградба на ефикасен систем за превенција и брза реакција, со што ќе се заштитат граѓаните и природните ресурси од природните катастрофи – потенцира Ѓорѓиевски.