Имотно-правните пречки ги кочат енергетските проекти

Како да се надминат административните пречки што го кочат спроведувањето на значајни енергетски проекти, беше прашањето на кое одговор побараа претставници од АД МЕПСО, Агенцијата за катастар на недвижности, Управата за имотно-правни работи, Министерството за транспорт и врски и Министерството за енергетика и минерални суровини.

Беше посочено дека главниот предизвик што го попречува развојот на овие проекти е долгото чекање на решенија за имотно-правни прашања и сложените процедури за упис на државниот имот во Катастарот.

– Оваа состојба директно го забавува напредокот на повеќе капитални инвестиции, меѓу кои и проектот Милетково, неопходен за стабилноста на електроенергетскиот систем во тој регион. Проектите од ваков обем не смеат да стојат во место поради долги и неефикасни административни процеси. Ова не е само техничко прашање – ова е прашање на енергетска сигурност и економски развој. Одговорноста на институциите е да обезбедат навремена и координирана работа, за државните инфраструктурни проекти да не чекаат непотребно –  нагласи министерката за енергетика, Сања Божиновска.

На состанокот беше договорено засилено меѓуинституционално координирање и утврдување на јасни процедури за забрзување на процесите. Министерството за енергетика, во соработка со надлежните институции, ќе работи на конкретни решенија за да се спречат идни застои и да се обезбеди навремена реализација на сите стратешки енергетски проекти.