Лажната снимка на потпретседателката на САД, Камала Харис, која кажува работи што всушност не ги кажала, предизвика загриженост за капацитетот на вештачката интелигенција да ги измами гласачите пред претседателските избори во САД на 5 ноември.
Видеото привлече внимание откако милијардерот Илон Маск го сподели на својата платформа Х во петокот вечерта без експлицитно да наведе дека видеото првично било објавено како пародија.
Видеото користи дел од вистински политички спот што Харис, веројатната демократска претседателска кандидатка, го објави минатата недела кога ја започна својата кампања.
Меѓутоа, во видеото – пародија, звукот е заменет со друг глас кој убедливо ја имитира Камала Харис.
„Јас, Камала Харис, сум ваш демократски кандидат за претседател откако Џо Бајден конечно ја покажа својата сенилност за време на дебатата“, вели гласот на видеото. Се додава дека Харис е ангажирана затоа што е жена, и не е бела и вели дека „нема идеја како да води држава“. Видеото го задржува визуелниот слоган на кампањата „Харис за претседател“ и додава автентични претходни снимки од Камала Харис.
Видеото, кое беше широко споделено на интернет, е пример за тоа како видео или аудио произведено од вештачка интелигенција се користени за исмејување на кандидатите и заведување на гласачите за политички прашања додека Америка се приближува до претседателските избори. Додека висококвалитетниот софтвер за вештачка интелигенција стана широко достапен, сè уште нема значителна активност на федерално ниво за регулирање на употребата на овие алатки, оставајќи ги правилата за употреба на вештачка интелигенција во политиката главно на државите и платформите на социјалните медиуми.
