„Игри на светлината“ – актови и портрети на Владимир Ѓоргиев; Изложба на фотографии во МКЦ

Во Галеријата на Младинскиот културен центар, на 3 април, со почеток во 19:00 часот, ќе се отвори изложбата на уметнички фотографии „Игри на светлината“ на Владимир Ѓоргиев.

Владимир Ѓоргиев е истакнат македонски фотограф со четири децении богато искуство во уметничката и во комерцијалната фотографија. Неговото патување во светот на фотографијата започнува со црно-белата техника и со сопствена лабораторија, создавајќи уникатен фотографски ракопис, кој постојано еволуира. Неговиот опус опфаќа широк спектар на жанрови – од модна и портретна фотографија, преку уметнички акт, до макро и пејзажна фотографија. Мајсторството во работата со светлото и исклучителното чувство за естетика го издвојуваат неговиот стил, што е особено видливо во неговите едиторијали и насловни страници за престижните списанија, вклучувајќи го и „Плејбој Македонија“ (Playboy Macedonia). Неговата работа е презентирана на бројни самостојни изложби во Скопје, Полска и во Чикаго.

-Последните дванаесет години активно работи и во полето на stock фотографијата, додека во најновата изложба „Игри на светлината” се враќа на своите омилени теми – уметничкиот акт и портретот, демонстрирајќи врвно мајсторство во манипулацијата со светлото, се вели кон изложбата која може да се посети до 24 април.