Израел не успеа да ги исполни барањата на САД да дозволи поголем хуманитарен пристап до Појасот Газа, каде што условите се полоши од кога било од почетокот на војната, соопштија денеска меѓународните хуманитарни организации.
Дури и откако војската даде дозвола за испорака на хуманитарна помош до најсеверниот дел на Газа, Обединетите нации соопштија дека не можат да ги достават повеќето работи поради ограничувањата наметнати од израелската војска.
Во меѓувреме, на југ, стотици камиони со помош се наоѓаат на страната на границата во Газа, исто така поради армиските ограничувања.
Минатиот месец, САД му дадоа на Израел рок, кој истекува денеска, дека војската мора да дозволи хуманитарна помош на палестинската територија.
Американската администрација предупреди дека неисполнувањето на барањето може да доведе до намалување на поддршката на Вашингтон за Израел.
Портпаролот на американскиот Стејт департмент, Метју Милер, минатата недела изјави дека Израел постигнал одреден напредок, но дека треба да направи повеќе.
Новиот израелски министер за надворешни работи, Гидеон Саар, вчера изјави дека е уверен оти „тоа прашање ќе биде решено“.
Осум меѓународни хуманитарни организации во својот извештај наведоа дека „Израел не само што не ги исполнил американските критериуми“, туку презел активности „што драматично ја влошија ситуацијата на теренот, особено во северниот дел на Газа, и дека ситуацијата денес е уште полоша отколку што беше пред месец дена”.
Во извештајот се наведени 19 мерки во согласност со барањата на САД.
Во него се наведува дека Израел не исполнил 15 и дека само делумно исполнил 4.
Обемот на хуманитарна помош останува далеку под американските стандарди.
Израелското воено тело задолжено за хуманитарна помош за Газа објави дека дозволило нова испорака на храна и вода.
Во октомври во Газа влегувале во просек по 57 камиони дневно, а во ноември 75, според официјалните израелски податоци, додека ОН тврдат дека од почетокот на октомври до нивната дестинација пристигнувале само 39 камиони дневно.
Луиз Вотериџ, портпаролка на агенцијата на ОН за палестински бегалци, рече дека армијата не го координирала движењето на камионите со помош.
„Ако не ни се обезбеди безбеден премин за да ја подигнеме хуманитарна помош, таа нема да стигне до луѓето на кои им е потребна“, рече таа.
