„Хотел за инсекти“ ќе се постави во Зоолошката градина

По повод Меѓународниот ден на аутизмот, ќе биде завршен еколошкиот инклузивен проект „Хотел за инсекти“, кој ќе биде претставен во вторник во 10:30 часот, во Зоолошката градина, каде што ќе се постават и изработените творби од учениците, a тоа се хотели за инсекти.

– И инсектите како и луѓето си имаат свои услови и свои потреби како треба да бидат направени тие живеалишта. Материјалите што ги користевме беа погодни за нив: дрвени подлоги, плитки гајби, цевки од трска или од бамбус, шишарки, струганици од дрво, глина… Внатрешноста на хотелите се заштита од ветар, дожд и од снег, како безбедно би можеле да се гнездат тие и да го одгледуваат своето потомство. Од предната страна ги покривме со жичена мрежа за да бидат заштитени од предаторите како што се птиците – објаснуваат од Националната галерија на Македонија, која го реализира проектот.

Оттаму додаваат дека направените хотели се поставуваат напролет, кога инсектите најмногу се движат и бараат место за хибернирање, одмор или размножување. Очекуваат дека првите станари ќе се вселат многу брзо и дека ќе бидат, како што велат, во својот хотел од соништата.

Покрај поставувањето хотели за инсектите, ќе биде презентиран и прирачникот за инсекти што го изработија студентите од Машинскиот факултет, на отсекот за индустриски дизајн.

– Промените во природата предизвикани од човекот не само што им отежнуваат на инсектите да најдат храна туку и, покрај нивната мала големина, како дивите пчели и бубачките, сè почесто имаат проблем да најдат места за гнездење. Ако се земе предвид дека околу 80 проценти од дивите растенија и повеќе од 150 важни култури зависат од опрашувањето на инсектите, овие засолништа се од исклучителна важност. Оттаму изградбата на хотели за инсекти во последниве години е сè популарна – наведуваат од Националната галерија на Македонија.

Оваа година како и сите претходни, Националната галерија на Македонија организира проекти што се значајни не само за подигнување на јавната свест за лицата со аутизам туку и за подигање на колективната свест и одговорност за управување со природата воопшто.

Работилниците се инклузивни и во нив учествуваа учениците од повеќе училишта: ОУ „Невена Георгиева- Дуња“, ОУ „Свети Климент Охридски“, ДСУ за рехабилитација и образование „Свети Наум Охридски“, како и студентите од Машинскиот факултет, од отсекот за индустриски дизајн.