Хаос на Алпите, повеќе од еден метар снег падна во април (ВИДЕО)

Телата на двајца мажи кои отидоа да помогнат во спасувачките напори беа пронајдени откако силна пролетна бура погоди делови од северна Италија и донесе повеќе од еден метар снег на делови од Алпите.

Невремето ги затвори скијачките центри, го запре сообраќајот и однесе уште најмалку еден живот. Зафатени се области во Франција, Италија и Швајцарија. Патиштата беа затворени, железничкиот сообраќај е во прекин, а делови од регионот останаа без електрична енергија, пишува France24.

Иако снегот во април не е невообичаен за Алпите, количината која падна за само неколку часа ги изненади и властите и локалното население.

Во Италија, телата на 64-годишен маж и неговиот 33-годишен син се пронајдени во близина на Виченца, во регионот Венето, со што бројот на жртвите во таа земја се искачи на три.

Таткото и син доброволно се пријавија да учествуваат во спасувачките операции откако обилните дождови го погодија северот на земјата. Тие биле на пат кога нивното возило било однесено од поројот. Шефот на регионот, Лука Заја, го опиша настанот како незамислива трагедија.

Еден ден претходно, 92-годишен маж беше пронајден мртов во неговиот поплавен дом во северниот регион Пиемонт, соопштија пожарникарите. Во официјалниот извештај се наведува дека интензивен и силен дожд го зафатил северот на Италија, а над 1800 метри надморска височина се претворил во снег.

Во францускиот ски-центар Вал Торенс, една жена доживеа срцев удар откако беше затрупана од лавина, соопштија властите. Во Тиња, властите им наредија на жителите да останат внатре, откако во текот на ноќта паднаа повеќе од 1,1 метар снег.

„Сите автомобили се затрупани до покривот… Самото одење надвор е загрижувачко“, рече Матис, вработен во хотел во Тињес. Предупредувањето за лавина е подигнато на највисоко ниво во неколку региони, а затворени се и некои скијачки центри. Во швајцарскиот град Сион, кој има 36.000 жители, властите исто така им наредија на луѓето да останат дома.