Палестинската исламистичка организација Хамас соопшти дека има информации за намерата на Израел да спроведе спасувачка операција слична на онаа во бегалскиот камп Нусејрат во јуни и се закани дека ќе ги „неутрализира заложниците“ доколку се случи обидот.
Агенцијата Ројтерс имала пристап до соопштението, јавуваат израелските медиуми.
Хамас им наредил на своите оперативци да не размислуваат за последиците и да ги следат упатствата, а Израел е одговорен за судбината на заложниците, се вели во интерното соопштение.
Не е прецизирано кога се очекува споменатата израелска операција.
Во меѓувреме, израелските власти ги демантираат извештаите на арапските медиуми дека израелска делегација утре ќе отпатува во Каиро за да преговара за заложниците, објави новинската страница Аксиос.
Израелскиот министер за одбрана, Израел Кац, изјави денеска дека „има шанса овојпат навистина да се постигне напредок кон договор за заложниците“.
„Најважното нешто во војната денес е да ги донесеме заложниците дома. Тоа е главната цел пред нас и работиме на сите начини тоа да се оствари“, изјави Кач.
Тој додаде дека „интензитетот на притисокот врз монструозната организација наречена Хамас е зголемен и има шанси“.
Во нападот на палестинските екстремисти предводени од Хамас на југот на Израел на 7 октомври 2023 година, беа убиени околу 1.200 луѓе, а повеќе од 250 заложници беа киднапирани и однесени во Газа.
Според податоците на израелските власти, околу сто од нив сѐ уште се приведени, но се знае дека не се сите живи.
