„Гренланд ќе биде наш“: Остри реакции по посетата на Венс на островот, Трамп не се откажува од преземање на територијата

Американскиот претседател Доналд Трамп во саботата одби да ја отфрли можноста за воена интервенција во неговата кампања за преземање на Гренланд, наведувајќи дека има обврска да обезбеди контрола над оваа данска територија, која веќе постојано ги отфрла неговите обиди.

„Ќе го преземеме Гренланд, сто проценти“
Еден ден откако високи претставници на администрацијата, вклучително и потпретседателот Џеј Ди Венс, ја обиколија американската воена база на островот, Трамп во интервју за Ен-Би-Си Њуз потврди дека „апсолутно“ разговарал за анексија на Гренланд.

„Ќе го земеме Гренланд. Да, сто проценти“, рече Трамп, пренесе NBC.

За време на посетата во петокот, Венс остро ја критикуваше Данска, обвинувајќи ја дека не инвестира доволно во безбедноста и со тоа го оставила Гренланд ранлив на потенцијалните закани од Русија и Кина. Тој го повика народот на Гренланд да се отцепи од Данска, за да дозволи преговори со САД за потенцијално преземање.

Во изјавата за медиумите, Венс истакна дека не сугерира официјална промена на политиката на САД, но повтори дека Трамп верува дека веројатно нема да биде потребна воена интервенција.

„Ние мислиме дека никогаш нема да биде потребна воена сила“, рече Венс од базата Питуфик.

Трамп: Не исклучувам воена сила
Запрашан за коментарите на Венс во интервју за NBC, Трамп ја потврди својата решеност САД да ја преземат контролата врз островот, но додаде дека има „добри шанси“ тоа да се постигне по мирен пат.

„Не, никогаш не исклучувам воена сила. Но, мислам дека има добри шанси да го решиме ова без неа“, рече Трамп, според ABC News.

„Наша одговорност е да го заштитиме светот. Ова е прашање на глобален мир и меѓународна безбедност. Се додека сум претседател, тоа е моја должност. Не исклучувам ништо.

Остри реакции по посетата на Венс
Посетата на Венс и други високи претставници на администрацијата на Трамп, вклучително и неговата сопруга Уша Венс, го замени претходно планираното повеќедневно патување што втората дама требаше да го направи без него. Оригиналниот план беше откажан откако поранешниот премиер на Гренланд ја нарече посетата „отворено агресивна“ и „провокација“, а гренландските власти соопштија дека американската делегација не била поканета да оствари официјална посета на островот.

Потпретседателот Венс, заедно со советникот за национална безбедност на Трамп, Мајкл Волц и секретарот за енергија Крис Рајт, наместо тоа, ја обиколија американската воена база на Гренланд.

Во своите изјави, Венс ја обвини Данска за „неинвестирање“ во безбедноста на островот.

„Нашата порака до Данска е јасна: не направивте доволно за народот на Гренланд“, рече Венс. „Тоа мора да се смени. А бидејќи не се промени, политиката на претседателот Трамп за Гренланд е токму оваа“.

Данскиот министер за надворешни работи, Ларс Леке Расмусен, на социјалната мрежа Х одговори дека Данска може да прифати критика, но не и тон со кој администрацијата на Трамп му се обраќа на својот сојузник.

„Така не разговарате со блиските партнери“, рече Расмусен, повикувајќи ги САД да соработуваат со Данска за зајакнување на своето воено присуство на Гренланд.

Новиот премиер на Гренланд, Јенс-Фредерик Нилсен, рече дека коментарите на американските официјални лица покажуваат „недостаток на почит“ кон неговата земја.

Иако Данска е членка на НАТО, а мнозинството Гренланѓани се против влезот на САД, Трамп не се откажува.

„Гренланд ни е исклучително важен за меѓународната безбедност. Мораме да го имаме Гренланд“, рече Трамп во петокот во Белата куќа.