Српскиот ас Новак Ѓоковиќ не успеа да го подигне 100. трофеј во кариерата откако во финалето на турнирот во Мајами беше сопрен од Јакуб Меншик (Чешка). По драма и два тај-брејка, победи неговиот наследник со 7:6, 7:6.

Условите за игра беа голем проблем за двајцата играчи, влажноста беше дури 88 проценти, а мечот почна со речиси седум часа доцнење поради врнежите, кои не престанаа цел ден. Се чини дека тоа му направи многу повеќе проблеми на Ѓоковиќ отколку на Меншик, што се виде и во текот на натпреварот.

Српскиот ас во еден момент побара помош од судијата Рено Лихтенштајн и преку собирачот на топки, доби специјален прав или пудра. Тоа е мешавина направена од струганици од изгребано дрво и се користи за подобрување на држењето на рекетот.

Јасно е дека двајцата играчи го имаа истиот проблем, им се лизгаа рекетите од рацете, но Новак се обиде да најде решение. Ова е нешто што го правеше Иван Лендл во текот на својата играчка кариера.

Сега, пред Новак е сезоната на земјена подлога, ќе игра на неколку турнири и ќе се обиде што подобро да се подготви за Ролан Гарос, вториот грен-слем во сезоната.

Прво ќе учествува на турнирот во Монте Карло (6-14 април), каде што лани, во полуфиналето, беше поразен од Каспер Руд, и брани 400 бода. Недолго потоа следува турнирот во Мадрид (од 23 април до 4 мај), тој не играше таму во претходните две сезони, па не брани бодови. Потоа ќе игра на мастерсот во Рим (7-18 мај) и таму не брани многу бодови, бидејќи испадна во третото коло. На ова натпреварување, по тримесечна суспензија, се враќа и Јаник Синер.

 

 

ИЗДВОЕНИ

ПОВРЗАНИ ОБЈАВИПОВЕЌЕ ОД АВТОРОТ