Најдобриот тенисер на сите времиња, Србинот Новак Ѓоковиќ, се огласи на социјалната мрежа Инстаграм и предизвика огромно внимание објавувајќи фотографија од Кристијано Роналдо, со порака: „Следува нешто интересно“.
Овој маркетиншки потег би можел да има врска со новиот поткаст на Роналдо, во кој славниот фудбалер вложува многу енергија, како и неговиот профил на Јутјуб. Името на Новак е во списокот на голем број познати имиња кои Роналдо ги одбележа во споменатата објава што ја сподели Ѓоковиќ.
Во него Португалецот ги одбележа ѕвездата на Реал Мадрид, Килијан Мбапе, легендата на италијанскиот фудбал Џорџо Кијелини, познатиот голман на Фиорентина, Давид Де Хеа, култните дефанзивци Рио Фердинанд, Пепе…
Познато е дека Новак и Кристијано имаат голема почит еден кон друг, што се покажува и кога се заедно и кога не се. Ѓоковиќ во неколку наврати славеше во стилот на Роналдо, дури и кога играше голф.
На својот YouTube канал „@cristiano“ Роналдо веќе за три месеци собра 71,5 милиони претплатници, а има само 78 видеа. Сигурно е дека многу брзо ќе достигне до 100 милиони, бидејќи тешко е да се замисли позната личност која може да привлече толку голем број познати личности.
Ѓоковиќ сезоната ја заврши порано со цел да се одмори пред новите предизвици. Тој новата сезона ќе ја почне од Бризбејн, турнир кој ќе му биде последна подготовка пред настапот на Австралија опен каде што ќе ја брка својата 11. титула.
