Германска банка предупредува: Погледнете ги внимателно банкнотите од 20 и 50 евра – некои се фалсификувани

Според податоците на германската Бундесбанка, минатата година во Германија биле запленети повеќе фалсификувани банкноти отколку што било случај од 2017 година. Уште позагрижувачки е тоа што квалитетот на фалсификатите не е значително подобрен, а една стара измама и понатаму успева. Но, колку е реална опасноста од фалсификувани пари? И како можете да препознаете фалсификувани банкноти на прв поглед?

Од каде доаѓаат фалсификуваните пари?

Фалсификувањето пари постои откако постојат банкнотите, но благодарение на интернетот пристапот до фалсификуваните банкноти е полесен од кога било. Фалсификуваните пари често доаѓаат од источноевропските земји или од Азија, каде што илегалните печатници произведуваат фалсификати во големи количини. Анализата на Бундесбанк покажува дека 72.413 фалсификувани банкноти биле запленети во Германија во 2024 година од страна на полицијата, трговците на мало и банките. Ова е за 28 отсто повеќе од претходната година, а сличен пораст е забележан од 2022 до 2023 година.

Особено чести се банкнотите означени како „Movie Money“ или „Prop Copy“. Криминалците ги користат овие банкноти од филмски реквизити за да ги измамат потрошувачите. Таквите фалсификати често завршуваат во оптек – често преку луѓе кои ги заменуваат со вистински пари.

„Дури и печатените материјали што личат на банкноти и може да се помешаат со вистински пари се нелегални“. Во Германија, речиси една петтина (17 проценти) од сите запленети фалсификати се токму такви пари со натписи како „Movie Money“ или „Prop Copy“, предупредува Буркхард Балц, шеф на Бундесбанк.

Кои фалсификувани пари најчесто се наоѓаат во оптек?

Најчесто фалсификувани банкноти се од 20 и 50 евра, кои често се користат во секојдневните плаќања. Само банкнотите од 50 евра сочинуваат 40 отсто од сите фалсификати запленети во Германија. Се поголем е и бројот на фалсификувани монети од 2 евра, иако во помал обем. Бројот на запленети фалсификувани евро банкноти во Европа е зголемен за 18,6 отсто во однос на претходната година, на вкупно 554.000. Еден од главните фактори за ова зголемување е ширењето на т.н. филмски пари. На крајот на октомври Европол изврши координирана полициска операција во 18 европски земји, при што беа запленети 174 пакети со фалсификувани пари. Поголемиот дел беше означен и како „Movie Money“ со номинална вредност од 14 милиони евра.

„Зебелажавме зголемување на бројот на фалсификувани банкноти и во Германија и во еврозоната. Но, тоа не значи дека фалсификатите се подобрија: повеќето од нив се сè уште примитивни и лесно препознатливи“, заклучува Балц.

Како да препознаете фалсификувани пари?

За да препознаете фалсификувани пари, обрнете внимание на безбедносните карактеристики на банкнотите на еврото, како што се воден печат, холограм и безбедносна лента. Дополнително, постојат специјални маркери за проверка на парите кои покажуваат хемиска реакција при печатењето на банкнотите. Ако ознаката се затемни, тоа се фалсификувани пари.

Колку е голем ризикот од фалсификувани пари во вашиот паричник?

Бундесбанката ја смирува загриженоста: иако бројките се зголемуваат, ризикот за потрошувачите останува релативно низок. Статистички, на 10.000 жители има девет фалсификувани банкноти. Ако сте внимателни и запознаени со безбедносните карактеристики, можете да се заштитите од измами во повеќето случаи.

Како да се заштитите од фалсификувани пари?

Најважниот совет: добро погледнете ја банкнотата и проверете ја доколку се сомневате. Посебна претпазливост е потребна кога се прават поголеми готовински трансакции. Ако навистина примите фалсификувана банкнота, единствениот правен начин на дејствување е да го пријавите во полиција или во банка – бидејќи дополнителното предавање на фалсификувани пари, дури и ненамерно, е казниво, пишува Феникс магазин.