Германија подготвена да ја заостри имиграциската политика

Германија би можела да ја заостри својата миграциска политика по изборите, бидејќи Фридрих Мерц, претседателот на ЦДУ и кандидат на партијата за германски канцелар, кој најверојатно ќе стане следниот канцелар на изборите следниот месец, претстави радикален план да обезбеди мнозинство за својата партија и сузбивање на влијанието на екстремно десничарската партија AfD, чија популарност значително порасна поради незадоволството на Германците од миграциската политика на сите претходни германски федерални влади.

Мерц претстави план од пет точки за заострување на миграциската политика, кој предвидува постојани гранични контроли со сите соседни земји и враќање на луѓето без валидни документи за влез, без разлика дали бараат заштита.

Дополнително, лицата од кои се бара да ја напуштат земјата треба веднаш да бидат приведени. Целта на планот е да се спречи илегалната миграција и да се зајакне јавната безбедност. Планот предвидува и стопирање на практиката на обединување на семејствата, односно странските државјани да добиваат германска виза врз основа на тоа што членовите на нивните семејства се веќе во Германија.

По смртоносниот напад со нож во Ашафенбург, Мерц повика на итен прекин на процесот за азил, што предизвика жестока политичка дебата. Во нападот лице со авганистанско потекло уби две лица, од кои едно дете. Напаѓачот рани уште три лица, меѓу кои и двегодишно девојче.

Сојузниот канцелар Олаф Шолц остро го критикуваше планот и го обвини Мерц дека го игнорира основното право на азил и европските договори.

Сепак, според анкетата на институтот за истражување на јавното мислење Инса, нарачана од весникот „Билд“, 66 отсто од Германците го поддржуваат предлогот на претседателот на ЦДУ. Дури и меѓу гласачите на СПД, планот ужива широка поддршка: 56 отсто од поддржувачите на СПД го поддржуваат предлогот, додека само 30 отсто се против.

Дури и меѓу поддржувачите на Зелените, има одредена поддршка: иако приближно 52 отсто го отфрлаат планот, речиси една третина го поддржуваат планот на претседателот на ЦДУ. Така, миграцискиот план на Мерц ужива мнозинска поддршка кај гласачите од речиси сите партии – освен Зелените и Левицата.