Фредериксен: САД нема да го преземат Гренланд

Данската премиерка Мете Фредериксен вети дека ќе го поддржи Гренланд откако американскиот претседател Доналд Трамп изрази интерес за преземање на данската полуавтономна територија кога таа пристигна во Нук на разговори со новата влада, пренесува Ројтерс.

Фредериксен го започна тридневното патување до огромниот арктички остров помалку од една недела по посетата на територијата на американскиот потпретседател Џеј Ди Венс, кој доби ладен прием од властите во Данска и Гренланд.

„САД нема да го преземат Гренланд. Гренланд им припаѓа на Гренланѓаните“, им рече Фредериксен на новинарите во главниот град на Гренланд, Нук, веднаш по нејзиното пристигнување.

Данската лидерка рече дека сака да го поддржи Гренланд „во многу, многу тешка ситуација“. Пред посетата, таа изјави дека нејзината цел е да ги зајакне врските на Копенхаген со островот и ја нагласи важноста на соработката со почитување во време на, како што опиша, „голем притисок врз Гренланд“.

Заладени односи
Идниот премиер на Гренланд Јенс-Фредерик Нилсен, кој победи на минатомесечните парламентарни избори и ќе формира коалициска влада, го поздрави доаѓањето на премиерот Фредериксен, велејќи дека Данска останува „најблискиот партнер на Гренланд“.

Фредериксен вети дека ќе направи се што може за да обезбеди еднакви права за Гренланѓаните и Данците во данското кралство.

„Најмногу од сè треба да разговараме за надворешната и безбедносната политика, геополитиката и за тоа како да и пристапиме на оваа многу, многу тешка задача заедно бидејќи тоа е она за што сега се работи.

Се очекува новата коалиција Нилсен официјално да ја преземе функцијата на 7 април.

Односите меѓу Гренланд и Данска беа затегнати по откритијата во последниве години за историската злоупотреба на Гренландците под колонијална власт.

Анкетите покажуваат дека мнозинството од 57.000 жители на Гренланд ја поддржуваат независноста од Данска, но многумина се противат на брзањето да бараат независност, стравувајќи дека нивниот остров може да биде изложен на интересите на САД.