Јавното претпријатие Комунална хигиена во однос на објавените тврдења на Општината Карпош за нехигиената, се правда дека посочената фотографија објавена во медиумите е снимена и објавена пред неколку години и како што велат ни најмалку не ја отсликува реално моменталната состојба со подигнувањето на отпадот во оваа скопска општина.
Воедно, информираат и дека подигнувањето и транспортот на комуналниот отпад од контејнерите и од кантите во индивидуалните домаќинства во општината Карпош се одвива согласно вообичаената динамика предвидена со Оперативниот план за собирање комунален отпад на територијата на градот Скопје.
При тоа, ја поздравуваат идејата на Општина Карпош да го засили инспекцискиот надзор на терен и ги охрабруваат конечно барем еднаш и да санкционираат некој од бројните прекршители на Законот за одржување на јавната чистота кои секојдневно непрописно одлагаат отпад на јавните и сообраќајните површини во оваа скопска општина.
