Фолксваген планира веднаш да ги зголеми цените поради царините за автомобили на Трамп

Германскиот производител на автомобили Фолксваген планира веднаш да ги зголеми цените на своите возила што се испорачуваат во САД, сугерирајќи дека царините од 25 отсто на Доналд Трамп ќе имаат непосредно влијание врз најголемиот европски производител на автомобили.

Фолксваген испратил меморандум до американските дилери со кој ги информирал за новите царини, како и за одлуката за привремено прекинување на испораките на автомобили од Мексико во САД, додека возилата што се испорачуваат од Европа извесно време ќе се чуваат на американските пристаништа, објави порталот Automotive News.

Портпаролот на Фолксваген го потврди постоењето на меморандумот, но одби да ја коментира неговата содржина.

Царините на Трамп претставуваат „фундаментална пресвртница во трговската политика“, рече Хилдегард Милер, претседател на Здружението на германската автомобилска индустрија (ВДА).

Според неа, политиките што ги спроведува администрацијата на Трамп ќе произведат само губитници, вклучително и во САД, каде што потрошувачите ќе бидат погодени од „растечката инфлација и намалениот избор на производи“, пишува Блумберг, пренесува Танјуг.