Филмот што сите го гледаа во 2000-тите добива продолжение по 14 години

По долгоочекуваниот тизер, објавен на почетокот на февруари, вчера конечно пристигна официјалниот трејлер за Final Destination Bloodlines, кој донесе нови детали за заплетот. Овој филм доаѓа 14 години по последниот дел од франшизата, Финална дестинација 5 од 2011 година, која ја освои публиката ширум светот.

Филмот ја следи студентката Стефани (Кејтлин Санта Хуана) која е опседната со кошмари. Се враќа дома во потрага по одговори и бара помош од баба си. Таа открива дека нејзината баба, кога била млада, спасила многу луѓе од смрт, што на самата смрт воопшто не и се допаднало. Сега дојде време смртта конечно да си го бара долгот од сите нив, бидејќи тие навистина не требаше да постојат. Дали Стефани и нејзиното семејство ќе успеат да ја избегнат смртта? Одговорот на тоа прашање ќе го дознаеме наскоро.

Филмот е во режија на Адам Стајн и Зак Липовски по сценарио на Гај Бусик и Лори Еванс Тејлор, а главните улоги ги толкуваат Кејтлин Санта Хуана, Тео Брионс, Ричард Хармон, Овен Патрик Џојнер, Ана Лоре и Брек Басинџер. Не смееме да го заборавиме враќањето на Тони Тод, кој стана незаменлив дел од франшизата.

Final Destination Bloodlines пристигнува во кината на 15-ти мај, со светска премиера истиот ден. Со оглед на долгото чекање и големата популарност на франшизата, многумина очекуваат ова продолжение да ги сруши рекордите на бокс офисот, бидејќи франшизата има верни обожаватели кои со нетрпение го очекуваат секој нов филм.