СДСМ, на локалните избори во октомври, ќе прави коалиции во секоја општина посебно, најави лидерот на партијата, Венко Филипче. Тоа, како што посочи на денешната прес-конференција во седиштето на партијата, не ја исклучува можноста и да не влезат во коалиција со друга партија, граѓанска организација или независна листа и дека ќе се разговара за опциите.
– Ќе го кажам ставот што сè уште не е потврден, но сите дискусии одат натамум во рамките на раководството, пратеничката група, Централниот и Извршниот одбор, а тоа е дека на овие локални избори СДСМ ќе прави коалиција за секоја општина посебно – изјави Филипче.
Прашан дали тоа значи дека е можна коалиција со ДУИ во одредени општини, Филипче рече „ќе видиме, ќе разговараме за опциите“, а во однос на можноста за коалиција со ВМРО-ДПМНЕ во Кичево, рече дека тоа „е секогаш интересно прашање, кое зависи од многу фактори“ и дека може да се зборува за тоа поконкретно во следните месеци.
– Водиме два паралелни внатрепартиски процеси. Првиот процес што ќе следува е избор на претседател на партијата. Мојот мандат завршува на 21 март и веќе се закажани изборите за 16 март. Паралелно со тоа, новите раководства во општинските организации работат на идентификување на имињата, внатрепартиски, но и на други можни наши потенцијални коалициски кандидати од други партии или независни листи и граѓански организации, со кои би разговарале да се поддржиме соодветно, коалициски – рече Филипче.
Овој процес, според Филипче, треба да заврши кон крајот на март, за најдоцна во првата половина на април да ги имаат првичните сознанија од анкетите.
