Фицо до Калас: Ќе одам на парадата во Москва, никој не може да ми забрани!

Словачкиот премиер Роберт Фицо изјави дека ќе присуствува на прославата на 9 мај во Москва и дека тоа никој не може да му го забрани.

Тој одговари на коментарот на високата претставничка на ЕУ за надворешна политика и безбедност Каја Калас дека блокот нема да учествува во одбележувањето на 80-годишнината од победата на Русија во Втората светска војна и дека било чие учество „нема да биде лесно сфатено од европската страна“.

Таа нагласи дека Брисел не сака ниту една земја кандидат да учествува на настанот.

„Предупредувањето и заканата на Каја Калас се непочитување и остро се спротивставувам“, објави Фицо на Х профилот.

„Ќе одам во Москва на 9 мај. Дали предупредувањето на г-ѓа Калас е форма на уцена или сигнал дека ќе бидам казнет по враќањето од Москва? Не знам. Но знам дека годината е 2025, а не 1939 година“, рече Фицо.

Тој оцени дека предупредувањето на Калас потврдува дека е потребна дебата во ЕУ за суштината на демократијата, „за тоа што се случи во Романија и Франција во врска со претседателските избори, за „мајданите“ организирани од Западот во Грузија и Србија“, и за тоа како се игнорираше злоупотребата на кривичното право против опозицијата во Словачка.