Еврото може да ја загуби својата привлечност како глобална резервна валута на сметка на доларот и на јапонскиот јен, како и на кинескиот јуан. Според Европската централна банка (ЕЦБ), уделот на еврото во глобалните девизни резерви, најверојатно, дополнително ќе опадне, бидејќи Русија ќе стане слободна да ги намалува сопствените резерви во оваа валута.
– Растечката улога на Кина во глобалната трговија ја охрабрува употребата на јуанот. До 2023 година, уделот на јуанот во кинеското трговско фактурирање се зголеми на околу една четвртина за стоки и една третина за услуги. Кинеската валута веќе се натпреварува со еврото за второто место во рангирањето на најкористените валути за финансирање на трговијата – се вели во публикацијата на ЕЦБ.
За да се диверзифицираат и за да се заштитат од геополитички ризици, централните банки, особено Народната банка на Кина, трупаат злато со најбрзо забележано темпо од Втората светска војна. Некои земји истражуваат начини да ги користат своите валути повеќе во меѓународните трговски трансакции наместо валутите на земјите што ја санкционираат Русија.
