Европол: Разбиени се четири главни мрежи за трговија со дрога во ЕУ и Турција – уапсени се 232 осомничени

Органите за спроведување на законот ширум Европа и Турција, со поддршка на Европол, спроведоа координирана операција со која беа разбиени четири големи криминални мрежи вклучени во трговија со дрога и перење пари. Операцијата резултираше со апсење на 232 осомничени, вклучително и цели од висок профил, и заплена на имот во вредност од над 300 милиони евра.

Уапсени се вкупно 232 осомничени, вклучително и лица кои играле клучна улога во операциите за трговија со дрога и перење пари, соопшти денеска Европол.

Истрагите опфатија повеќе јурисдикции, а властите во Белгија, Франција, Германија, Холандија и Шпанија извршија рации и апсења во соработка со Европол.

Во текот на истрагите, според „Европол“, во Турција и Европа биле запленети средства во вредност од над 300 милиони евра, вклучувајќи 681 имот и 127 возила.

Овие криминални организации – кои дејствуваа независно, но колективно имаа огромно влијание – се етаблираа како доминантни играчи во европската трговија со дрога.

Според Европол, користејќи традиционални шверцерски патишта, но и софистицирана логистика, овие групи се поврзани со заплена на најмалку 21 тон дрога во Европа и Турција, вклучително и 3,3 милиони таблети МДМА. Инспекторите, исто така, ја открија нивната вмешаност во перење пари, насилни злосторства и поширока мрежа на организиран криминал.

Позната како Operation BULUT (што значи „облак“ на турски), оваа операција управувана од податоци беше спроведена врз основа на информации извлечени од платформите SkyECC и ANOM.

Како дел од оперативната рамка, француските власти споделија дешифрирани податоци од SkyECC со Турција, за да ги поддржат локалните истраги против највлијателните осомничени за организиран криминал во таа земја. Како дел од тековната судска соработка поврзана со податоците на SkyECC, француското обвинителство JUNALCO ги обработува сите барања за меѓународна правна помош испратени од заинтересираните држави. Разузнавачките информации од АНОМ беа доставени до турските власти од страна на Австралиската федерална полиција, што дополнително ја збогати разузнавачката слика.

Оваа соработка овозможи распоредување на членови на турската национална полиција во седиштето на Европол, каде што работеа рамо до рамо со европските истражители за да ги анализираат шифрираните комуникации и да ги идентификуваат криминалните мрежи кои дејствуваат во Турција.

Собраните информации доведоа до првата серија апсења во Турција, насочени кон клучните личности на врвот на хиерархијата на трговија со дрога. Бидејќи истрагата откри значајни врски со организираниот криминал низ ЕУ, операцијата влезе во втора фаза – координирана од Европол – здружувајќи ги агенциите за спроведување на законот од неколку земји-членки за да ги попречат активностите на мрежите на европско тло.

„Европол“ одигра клучна улога во оперативната фаза со воспоставување платформа за координација во реално време меѓу избраните координатори од различни земји. Овој систем овозможи брзи и ефикасни одлуки, како и континуирано прилагодување на стратегијата во согласност со развојот на ситуацијата“, велат од „Европол“.

Од „Европол“ велат дека оваа операција е дел од пошироката стратегија за поддршка на земјите-членки на ЕУ во систематско идентификување, таргетирање и разбивање на најотпорните криминални мрежи кои работат во Европа, без оглед на тоа каде се наоѓаат.

„Овие криминални мрежи се потпираат на меѓународни синџири за снабдување и сложени структури за шверц на дрога и перење нелегално стекнати пари преку повеќе јурисдикции“, соопшти „Европол“.