Европа тоне во климатски хаос: Три земји погодени од екстремни временски настани

Во последните 30 години, забележани се повеќе од 9.400 екстремни временски настани, кои донесоа катастрофални последици за Европа и светот – речиси 4,02 трилиони евра економски загуби и над 765.000 смртни случаи.

Според најновиот извештај на организацијата „Germanwatch“, три европски земји – Италија, Грција и Шпанија се меѓу десетте најпогодени од климатските промени.

Италија: Пеколни горештини и смртоносни поплави

Италија е петта најтешко погодена земја во светот, со дури 38.000 смртни случаи и економски загуби од 57,8 милијарди евра. 2003 и 2022 година беа особено трагични поради топлотните бранови, пожарите и сушите, додека поплавите долж реката По во 1994 и 2000 година предизвикаа огромна штета на инфраструктурата и земјоделството.

Грција: Пекол на Медитеранот

Грција е на седмото место по уништување на климата, со 34.000 жртви во последните три децении. 2022 година беше особено смртоносна кога температурата во Фтиотис достигна 42,1°C, а шумските пожари од 1998, 2007 и 2022 година уништија огромни области и ги загрозија животите на илјадници луѓе. Вкупните економски загуби на Грција надминаа 6,7 милијарди евра.

Шпанија: Суши, пожари и разорни поплави

Шпанија претрпе 27.000 смртни случаи и 24 милијарди евра економски загуби. Најмногу го погодија топлотните бранови, додека сушата од 1999 година и поплавите во 2019 година предизвикаа непроценливи штети на земјоделството и инфраструктурата.

Климатската криза влегува во опасна фаза

Европската климатска служба Коперник потврди дека 2022 година била најтоплата година досега во Европа, додека истражувачите предупредија дека влегуваме во непредвидлива и дестабилизирачка фаза на климатските промени.

Иако богатите земји ветија 300 милијарди долари годишно за климатски фондови до 2035 година, експертите предупредуваат дека ова е само „минимален одговор“ на кризата која ќе биде уште побрутална во иднина.

(Euronews)