Лидерите на десничарските европски партии упатија честитки за победата на крајнодесничарската Партија на слободата на Австрија (ФПО) на австриските парламентарни избори.
Први што честитаа беа Марин Ле Пен и Џордан Бардела од француското Национално собрание, Герт Вилдерс од Холандската Партија на слободата и Алиса Вајдел, претседателката на германската Алтернатива за Германија.
„Не исполнува со голема гордост што можеме да седиме во Европскиот парламент покрај нашите сојузници од ФПО, кои извојуваа убедлива победа на парламентарните избори вечерва во Австрија“, изјави Бардела, која е и пратеник во Европскиот парламент, на социјалната мрежа Икс. Според него, владата создадена од ФПО ќе даде приоритет на суверенитетот, благосостојбата и идентитетот на Австрија.
„По изборите во Италија, Холандија и Франција, овој подем, кој повлекува одбрана на националните интереси, зачувување на идентитетот и заживување на суверенитетот, во секој случај го потврдува триумфот на нацијата“, рече Ле Пен.
„Срдечни честитки до ФПО“, напиша Вилдерс, кој изрази задоволство од зајакнувањето на десничарските партии во Европа.
„Срдечни честитки до Херберт Кикл и ФПО“, им се придружи Вајдел на честитките. Позитивни реакции стигнаа и од Белгија.
„Многу убедлива победа за нашите пријатели и партнери од австриската ФПО“, напиша белгискиот пратеник Геролф Анеманс од екстремно десничарската партија Фламански интерес на Икс.
Спротивно на тоа, Меѓународниот комитет за Аушвиц ја гледа победата на ФПО како загрижувачки развој на настаните.
„За оние кои го преживеаја Холокаустот, првите резултати од изборите за Националниот совет во Австрија, а особено зајакнувањето на десницата околу Херберт Кикл и ФПО, претставуваат нова алармантна фаза на нивните стравови и грижи“, рече потпретседателот на Комитетот за Аушвиц, Кростоф Хубнер. Тој додаде дека се надева на „единство на австриските демократи кои во интерес на земјата и европскиот интерес ќе се спротивстават на заборавот на историјата и идеологијата на старите и новите десничарски екстремисти“.
ФПО е основана во 1950-тите од поранешни членови на нацистичките СС дивизии и други ветерани на германската војска.
Претседателот на партијата Херберт Кикл на овие избори се кандидираше на платформа против странците, ветувајќи дека ќе изгради „тврдина Австрија“ за да ги спречи мигрантите да влезат во земјата.
Претседателот на партијата Херберт Кикл им вети на гласачите дека ако му ја дадат победата, ќе им служи како Volkskanzler, или „народен канцелар“, прекар што го користел Адолф Хитлер.
