ЕУ: Ако не постигнеме договор со Америка за царините, ќе одговориме со контрамерки

Европската унија првенствено сака да постигне решение со САД во однос на трговијата преку преговори, но доколку не успеат да произведат такво, ЕУ ќе одговори со контрамерки, изјави денеска во Вашингтон комесарот за економија на Европската комисија, Валдис Домбровскис, пренесува Хина.

Говорејќи на пролетниот состанок на Меѓународниот монетарен фонд и Светската банка, тој рече дека ЕУ веќе понудила да купува повеќе американски течен природен гас и да ги намали царините за увоз на одредени стоки, додавајќи дека Брисел ќе поздрави поголема јасност од Вашингтон за неговите очекувања.

„ЕУ стои на постојните партнерства и има намера да ги продлабочи, но ќе преговараме и за нови партнерства ширум светот за да ја зајакнеме нашата економска безбедност дома“, рече тој.

Тој додаде дека ЕУ е сигурен и предвидлив трговски партнер и ќе остане таков.

Блокот од 27 земји веќе има трговски договори со 76 земји, неодамна ги заврши преговорите за ново или зајакнато партнерство со Мексико, Швајцарија и четири јужноамерикански земји кои се членки на заедничкиот пазар на Меркосур, ги продолжува разговорите со Индија, Тајланд, Филипините и Индонезија, а исто така започна трговски преговори со Обединетите Арапски Емирати, рече Домбровскис.

„Целта на овие трговски договори е да се воспостават победнички партнерства кои се сигурни и засновани на правила“, додаде тој.

Европските претставници избегнуваа остри пораки во нивните одговори на жестоките критики на американскиот претседател Доналд Трамп за американско-европските трговски односи и ја истакнаа потребата од сигурни и предвидливи врски.

На 10 април, Унијата ги замрзна првите контрамерки против тарифите на Трамп за 90 дена, но претседателката на Европската комисија Урсула фон дер Лајен рече дека сите опции сè уште се на маса во однос на контрамерките.