Трговската војна меѓу двете најголеми светски економии нагло ескалира. Белата куќа објави дека Кина сега може да биде погодена со царини од дури 245 отсто за извозот во САД како резултат на нејзините „одмазднички мерки“.
Ова е највисоката царинска стапка некогаш спомната, како што е наведено во документот штотуку објавен, заедно со извршната наредба потпишана од американскиот претседател Доналд Трамп. Наредбата најави истрага за ризиците за националната безбедност на САД поради зависноста од увоз на преработени критични минерали и сродни производи.
На денешната прес-конференција портпаролот на кинеското Министерство за надворешни работи Лин Џијан беше прашан за царинската стапка од 245 проценти. Тој одговори дека „треба да се контактира американската страна за конкретни бројки“, објави кинескиот државен Глобал Тајмс.
🔥 245% tariff for China? Or is it just a typo?https://t.co/WsEKErVTPn pic.twitter.com/DYBQcFweXv
— Byron Wan (@Byron_Wan) April 16, 2025
Откако Доналд Трамп оваа година повторно стапи на должност американски претседател, тој го најави „Денот на економското ослободување на Америка“ – симболичен почеток на нова фаза на економска конфронтација со остатокот од светот, но пред сè со Кина. Во првите недели од неговиот мандат, администрацијата на Трамп започна серија агресивни трговски мерки, тврдејќи дека САД мора да престанат да зависат од „непријателските држави“ во стратешките сектори.
Во март беше воведена основна царина од 10 отсто за целиот увоз од повеќето земји во светот, со дополнителни таканаречени „реципрочни“ царини за земјите кои, според администрацијата на Трамп, го ограничуваат пристапот до американските стоки. Тие стапки за Кина експлодираа на 145 отсто, а сега, според податоците на Белата куќа, тие би можеле да се искачат до 245 отсто – највисоки во историјата на трговските односи меѓу САД и Кина.
Кина веднаш возврати: воведе царини од 125 отсто за американските стоки, го ограничи увозот на земјоделски производи и воведе контрола на извозот на ретки метали како што се диспрозиум и тербиум, клучни за производство на електрични возила и млазни мотори.
