По рекордните топли летни месеци во средината на септември, ни претстои вистинско есенско време со нагло заладување и дожд, велат метеоролозите.
Метеопрогнозерот Славчо Поповски вели дека таквата временска промена е резултат на спуштање на значително постудена воздушна маса од север, што вчера од попладневните часови нагло и значително ги спуштија температурите на повеќе места за околу, па и за повеќе од 10 степени, додека во северните предели се очекува пад дури за повеќе од 15 степени.
-Ветрот, кој од вчера почна да дува од северен правец, ќе се задржи и денеска преку целиот ден. Најизразен ќе биде долж Повардарјето, над 60 км/час. Денеска наутро температурите ќе бидат мошне пониски и ќе се спуштаат во интервалот од 3 до 14 степени, а максималните дневни температури на воздухот нема да бидат повисоки од 18 степени. Всушност, денешниот ден ќе биде најстуден ден. Особено студени утра и тоа поради разведрувањето ќе имаме во вторник и среда, и тие ќе се спуштаат во интервалот од -2 до 8 степени, па така на повеќе места е можна појава на слана и на мраз. Од вторник температурите ќе бележат тенденција на постепен пораст и до среда времето ќе биде стабилно и суво, а нов бран на пообилни врнежи од дожд ќе има од четврток, прогнозира Поповски.
Српскиот метеопрогнозер Иван Ристиќ и професорот Александар Ваљаревиќ објаснија зошто кон средината на овој месец имавме нагла промена на времето и дадоа сезонска прогноза за есента и зимата.
-Кон крајот на август и почетокот на септември имаше промена во циркулацијата на планетата Земја, се започна со невообичаени поплави во Сахара, прекин на создавање на ураганите на Атлантикот, иако океанот бележи рекордни температури откако се вршат мерењата. Исто така, во исто време, од временските карти исчезна исландскиот циклон, кој заедно со африканскиот антициклон владееше речиси 14 месеци и донесе рекордни температури на Балканот, кој беше меѓу најтоплите региони на планетата. Оваа промена на циркулацијата доведе до навлегување на ладен арктички воздух во срцето на Европа, па така покрај големиот студ и снег на планините поради обилните врнежи, поплави имаше речиси на сите реки кои имаат свои извори во Карпатите и Алпите. За среќа, немавме некои поголеми проблеми, бидејќи бевме во центарот на силниот циклон наречен Борис и релативно сме далеку од овие планински масиви – наведуваат двајцата метеоролози и додаваат дека атмосферските циркулации, односно неговите осцилации се главниот двигател на настаните на планетата во однос на временските услови, но и самата клима.
Тие исто така објаснија дека во сезонската прогноза имале климатски модел користејќи го оригиналниот ГИС метод за телеконекција за анализа на атмосферските осцилации (АО) развиен од проф. д-р Ваљаревиќ и дека Ристиќ дошол до слични заклучоци со својата теорија за климатските промени.
-Времето од октомври до крајот на февруари ќе биде под влијание на комбинацијата на Азурските Острови и сибирскиот антициклон. Помеѓу нив се отвора простор за повремени навлегувања на студен арктички воздух директно од Северниот Пол, што ќе донесе пад на температурата и врнежи, а како што одминува времето дождот ќе биде заменет со снег. Според среднорочниот модел на ECMWF, евидентна е ориентација на кракот на поларниот вител кон нашиот континент, во чии рамки ќе има повремени упади на студен арктички воздух.
Почетокот на октомври со промена на сонцето и облачноста која може да донесе дожд ќе биде посвеж, со највисока температура меѓу 17 и 22 степени. Околу 10, ќе има постепено стабилизирање на времето и зголемување на воздушниот притисок, така што ќе влеземе во таканареченото Михолско лето, период точно околу 12 октомври. Највисоката температура во тој период ќе има вредност околу 25 степени. Во втората половина на октомври и првата половина на ноември влегуваме во постуден период, а што се однесува до утринските температури, кои ќе се движат од пет степени до десет степени и максималните, кои ќе се движат меѓу 10 и 15 степени, на некои денови ќе биде магливо, особено во сливовите и долините на реките каде што маглата може да се задржи во поголемиот дел од утрото. Исто така, во одредени денови ќе има врнежи од дожд, а на планините и снег“.
Двајцата прогнозери најавуваат дека во втората половина на ноември со засилен продор на студен арктички воздух, ќе има многу врнежи, главно дожд и снег на планините, појава на снег се очекува и кон крајот на ноември во пониските предели на југ. Според нивната анализа, најниските температури на крајот на ноември ќе бидат од -2 до пет степени, а максималните од три до осум степени.
-Во декември променливото време сè повеќе ќе личи на вистинска зима. На почетокот и на средината на месецот две пократки затоплувања со максимални околу 10 степени како претходник на пристигнувањето на студен фронт, кој ќе донесе снег во поголем дел од регионот и пад на температурата до нула степени. Кон крајот на декември ќе има создавање на снежна покривка, така што е одлична шанса по којзнае колку години да ја дочекаме новата година во вистински зимски амбиент со снежна покривка“, велат српските метеоролози.
Според нив, во јануари и февруари ќе бидат навистина зимски, повремено ќе врне снег, а највисоката дневна температура ќе се движи од нула до пет степени, минималната во некои денови и до -10 степени Целзиусови.
Крајот на зимата и топењето пристигнуваат на крајот на февруари и почетокот на март. Сè на сè, оваа зима би можела да биде најстудена во последните 10 години“, велат метеоролозите.
